តាកែវៈ លោកអធិការងស្រុកទ្រាំង ទទួលបន្ទុកផ្នែកចរាចរណ៍បានប្រាប់Post Newsថា មានករណីគ្រោះថ្នាក់ចរាចរណ៍រវាងរថយន្តម៉ាកស៊ាំយ៉ុង បានបុកជាមួយនឹងម៉ូតូម៉ាកវ៉េវ បណ្តាលឲ្យបុរសម្នាក់ស្លាប់យ៉ាងអាណោចអាធ័ម។

ហេតុការណ៍នេះកើតឡើងកាលពីវេលាម៉ោង៤និង៣០នាទីល្ងាច ថ្ងៃទី៨ ខែកញ្ញា​ឆ្នាំ២០១៧ ស្ថិតនៅចំណុចភូមិប្រាំបីមុំ ឃុំប្រាំបីមុំ ស្រុកទ្រាំង ខេត្តតាកែវ។

អ្នកបើករថយន្តឈ្មោះ ណុប ណាន់ ភេទប្រុស អាយុ២១ឆ្នាំ មុខរបរកម្មករសំណង់ ស្នាក់នៅភូមិអង្គប្រាសាទ ឃុំអង្គប្រាសាទ ស្រុកគិរីវង់ ខេត្តតាកែវ ។ ចំណែកជនរងគ្រោះដែលស្លាប់មានឈ្មោះ ចាន់ សំអុល ភេទប្រុស អាយុ៤៣ឆ្នាំ ស្នាក់នៅភូមិល្វេថ្មី ឃុំប្រាំបីមុំ ស្រុកទ្រាំង ខេត្តតាកែវ។

មុនពេលកើតហេតុគេឃើញរថយន្តម៉ាកស៊ាំយ៉ុង ពណ៌ទឹកប្រាប់ គ្មានស្លាកលេខ បើកបរដោយបុរសម្នាក់ ទិសដៅពីជើងទៅត្បូង លុះដល់ចំណុចកើតហេតុក៏បុកជាមួយម៉ូតូម៉ាក វ៉េវ ពណ៌ក្រហម ពាក់ស្លាកលេខ តាកែវ 1H-7313 ពេញទំហឹងបណ្តាលឲ្យស្លាប់នៅនឹងកន្លែងតែម្តង។

ក្រោយហេតុ រថយន្តនិងអ្នកបើក និងម៉ូតូជនរងគ្រោះទៅកាន់អធិការដ្ឋាននគរបាលស្រុកទ្រាំង រង់ចាំដោះស្រាយគ្នាតាមច្បាប់បន្តទៀត៕