តាកែវៈ នៅថ្ងៃទី៨ ខែកញ្ញា ឆ្នាំ២០១៧ កម្លាំងអធិការដ្ឋាននគរបាលស្រុកត្រាំកក់ សហការជាមួយកម្លាំងនគរបាលក្រុងដូនកែវ បានធ្វើការបង្រាបក្រុមចោកាច់ករម៉ូតូយ៉ាងសកម្មមួយក្រុមមានគ្នា២នាក់ ដែលបានធ្វើសកម្មភាពនៅក្រុងដូនកែវ ខណៈជនសង្ស័យកំពុងរត់គេចខ្លួន។

ជនសង្ស័យទាំង២នាក់ ខាងលើម្នាក់មានឈ្មោះ យិន សារិទ្ធ ភេទប្រុស អាយុ៣២ឆ្នាំ ស្នាក់នៅផ្ទះជួល ផ្សារព្រៃទា សង្កាត់ចោមចៅ ខណ្ឌដង្កោ រាជធានីភ្នំពេញ មុខរបរមិនពិតប្រាកដ (ឃាត់ខ្លួន) និងម្នាក់ទៀតឈ្មោះ ចិន ភេទប្រុស ស្នាក់នៅផ្ទះជួលជាមួយគ្នា (បានរត់គេចខ្លួន)។

ក្រោយពេលឃាត់ខ្លួន សមត្ថកិច្ចដកហូតបានម៉ូតូ១គ្រឿងម៉ាក Honda C125 ស៊េរី២០១៥ ពាក់ស្លាកលេខភ្នំពេញ 1DG-2079 ដែលជារបស់ឈ្មោះ សំ ហាក់ ភេទប្រុស រស់នៅខេត្តកំពង់ស្ពឺ។ រីឯជនសង្ស័យឈ្មោះ ចិន ដែលបានរត់គេចខ្លួន ជិះម៉ូតូម៉ាក HONDA C125 ស៊េរី២០១៦ មិនចាំស្លាកលេខ។

បច្ចុប្បន្ន ជនសង្ស័យខាងលើសមត្ថកិច្ចកំពុងធ្វើការសាកសួរ ដើម្បីកសាងសំណុំរឿងបញ្ចូនទៅតុលាការ និងតាមចាប់ជនសង្ស័យដែលរត់គេចខ្លួនបន្តទៀត រីឯម៉ូតូដែលដកហូតបានពីជនសង្ស័យបានប្រគល់ជូនជនរងគ្រោះវិញ៕