កំពតៈ មេខ្លោងជួញដូរគ្រឿងញៀនចំនួន២នាក់ ត្រូវបានកម្លាំងសមត្ថកិច្ចឃាត់ខ្លួន នៅក្នុងបន្ទប់ រកឃើញកាំភ្លើងខុសច្បាប់ និងគ្រឿងញៀនមួយចំនួនធំ។

សមត្ថកិច្ចបានឲ្យដឹងថា ជនសង្ស័យដែលជាមេខ្លោងជួញដូរគ្រឿងញៀនខាងលើ ត្រូវបាន កម្លាំងព្រហ្មទណ្ឌខេត្ត សហការជាមួយកម្លាំងអធិការដ្ឋាននគរបាលក្រុងកំពត ឃាត់ខ្លួនបាន កាលពីវេលាម៉ោង១២ រំលងអធ្រាត្រ ឈានចូលថ្ងៃទី១១ ខែកញ្ញា ឆ្នាំ២០១៧ នៅក្នុងបន្ទប់ នៅភូមិកំពង់បាយខាងជើង សង្កាត់កំពង់បាយ ក្រុងកំពត ខេត្តកំពត។

សមត្ថកិច្ចបានបញ្ជាក់ទៀតថា ជនសង្ស័យ២នាក់រួមមាន ទី១មានឈ្មោះ ប៊ុន ដារ៉ា អាយុ៣៥ឆ្នាំ ស្នាក់នៅភូមិកំពង់បាយខាងជើង សង្កាត់កំពង់បាយ ក្រុងកំពត និងទី២ឈ្មោះ ផុន សុវណ្ណ ស្នាក់នៅភូមិត្រពាំងធំ ឃុំជុំគ្រៀល ស្រុកទឹកឈូ។

ក្រោយពេលឃាត់ខ្លួនបាន សមត្ថកិច្ចដកហូតថ្នាំញៀនបានចំនួន៧កញ្ចប់ (ធំ ៣កញ្ចប់, តូច៤កញ្ចប់) ជញ្ជីង១គ្រឿង ព្រមទាំងកាំភ្លើងខ្លីច្នៃ១ដើម។
បច្ចុប្បន្នជនសង្ស័យទាំង២នាក់ រួមទាំងវត្ថុតាំង ត្រូវបានសមត្ថកិច្ចកសាងសំណុំរឿងដើម្បីអនុវត្តតាមនីតិវិធីច្បាប់៕