ភ្នំពេញ: ជនសង្ស័យម្នាក់បានធ្វើសកម្មភាពគាស់ផ្ទះរបស់មន្ត្រីនរគបាលដើម្បីលួចយកទ្រព្យសម្បត្តិ ប៉ុន្តែខណ:ពេលកំពុងធ្វើសកម្ម ភាពត្រូវបានម្ចាស់បន្ទប់ទៅទាន់ ក៏បានស្រែកឆោរឡោថាចោរៗបង្កឲ្យមានការភ្ញាក់ផ្អើល ហើយអ្នកនៅជិតនោះបាននាំគ្នាជួយដេញតាមចាប់បានភ្លាមៗតែម្ដង បន្ទាប់មកនាំទៅប្រគល់ឲ្យនគរបាលប៉ុស្ដិ៍ចោមចៅ។

ហេតុការណីនេះបានកើតឡើងនៅវេលាម៉ោង១២ថ្ងៃត្រង់ ថ្ងៃទី១២ ខែកក្កដា ឆ្នាំ២០១៧ នៅត្រង់ចំណុចបន្ទប់ជួល ដែលមានទីតាំងស្ថិតនៅក្បែរផ្សារ វិន មីង ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីផ្នំពេញ។

ជនសង្ស័យខាងលើមានឈ្មោះ សេង សូនី អាយុ២៧ឆ្នាំ ភូមិឡឥដ្ឋ ឃុំឡឥដ្ឋ ស្រុកសង្កែ ខេត្តបាត់ដំបង និងសព្វថ្ងៃស្នាក់នៅនឹងមុខរបរមិនពិតប្រាកដ។

តាមប្រភពព័ត៌មានបានឲ្យដឹងថា នៅមុនពេលកើតហេតុម្ចាស់បន្ទប់បានទៅធ្វើការរោងចក្រ ដោយបានបិទទ្វារចាក់សោរបន្ទប់ចោលគ្មានអ្នកនៅចាំឡើយ លុះដល់ពេលកើតហេតុជនសង្ស័យបានទៅធ្វើសកម្មភាពគាស់បន្ទប់ ដែលពេលនោះគាស់បានសម្រេចហើយ ប៉ុន្តែមិនទាន់បានយកទ្រព្យសម្បត្តិនៅក្នុងនោះនៅឡើយផង ក៏ត្រូវបានម្ចាស់បន្ទប់ចេញពីហូបបាយថ្ងៃត្រង់ទៅដល់ទាន់។ ពេលនោះម្ចាស់បន្ទប់បានស្រែកថាចោរៗ បង្កឲ្យមានការភ្ញាក់ផ្អើល ហើយប្រជាពលរដ្ឋដែលកំពុងស្ថិតនៅទីនោះក៏បាននាំគ្នាជួយដេញ ចាប់បានភ្លាមៗតែម្ដង។

ក្រោយពេលកើតហេតុ ប្រជាពលរដ្ឋបាននាំខ្លួនជនសង្ស័យទៅប្រគល់ឲ្យនគរបាលប៉ុស្ដិ៍ចោមចៅធ្វើការសាកសួរនិងកសាងសំណុំរឿងចាត់ការតាមនីតិវិធីច្បាប់៕