បន្ទាយមានជ័យៈ ជនសង្ស័យ៤នាក់ ត្រូវបានសមត្ថកិច្ចឃាត់ខ្លួន ពាក់ព័ន្ធនឹងករណីប្រើអំពើហិង្សាដោយជនសង្ស័យមានគ្នា ៤ នាក់បានធ្វើសកម្មភាព ប្រើកាំបិតសាំម៉ូរ៉ៃកាប់ទៅលើជនរងគ្រោះ បណ្តាលឲ្យរងរបួស។

ហេតុការណ៍កើតឡើងនៅវេលាម៉ោង៤រសៀល ថ្ងៃទី១១ ខែកញ្ញា ឆ្នាំ២០១៧ នៅចំណុចខាងមុខក្លិបកម្សាន្តឌីស្កូ ថាច់ ដោន ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

សមត្ថកិច្ចបានឲ្យដឹងថា ជនរងគ្រោះមានឈ្មោះ អិន មុន្នី ភេទប្រុស អាយុ៣១ ឆ្នាំ ស្នាក់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត (រងរបួសដៃស្តាំ)មូលហេតុមានគំនុំនឹងគ្នា។

ក្រោយពេលកើតហេតុ កម្លាំងកងរាជអាវុធហត្ថខេត្តបានឃាត់ខ្លួនជនសង្ស័យទាំង៤នាក់រូមមាន៖ ទី១ឈ្មោះ រិន ទាវ ភេទប្រុស អាយុ១៧ ឆ្នាំ មុខរបរមិនពិតប្រាកដ, ទី២ឈ្មោះ ស៊ូ សារ៉ាក់ ភេទប្រុស អាយុ២៣ មុខរបរ មិនពិតប្រាកដ,ទី៣ឈ្មោះ ម៉ិល ម៉េងហ័រ ភេទប្រុស អាយុ១៦ ឆ្នាំ មុខរបរមិនពិតប្រាកដ(ជនដៃដល់) និងទី៤ឈ្មោះ រ៉ា លី ហៅម៉ាប់) ភេទប្រុស អាយុ២៦ឆ្នាំ មុខរបរមិនពិតប្រាកដ អ្នកទាំង៤ស្នាក់នៅម្តុំ ផ្សាររ៉ាថ្មីភូមិ ក្បាលកោះ សង្កាត់ប៉ោយប៉ែត ខេត្តបន្ទាយមានជ័យ។

ក្នុងនោះដកហូតបាន ដាវចំនួន២ដើម។

បច្ចុប្បន្ន ជនសង្ស័យទាំង៤នាក់ ត្រូវបានកម្លាំងជំនាញកំពុងកសាងសំណុំរឿងដើម្បីចាត់ការបន្តតាមនីតិវិធីច្បាប់៕