តុលាការឃុំ បុរសម្នាក់ ដែលវាយមន្ដ្រីនគរបាលព្រហ្មទណ្ឌកម្រិតស្រាល បែកក្បាលរយះ ៦ថ្នេរ

ភ្នំពេញៈ យោងតាមការបញ្ជាក់របស់សមត្ថកិច្ចបានឱ្យដឹងថា លោក ឡុង វណ្ណា ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាសម្រេចឃុំខ្លួន បុរសម្នាក់ដែលបានយកប៉ាន់តែ វាយក្បាលមន្ត្រីនគរបាល ព្រហ្មទណ្ឌកម្រិតស្រាលបែកក្បាលរយះ ៦ថ្នេរ ជាបណ្ដោះអាសន្ននៅពន្ធនាគារព្រៃសហើយ នៅព្រឹកថ្ងៃទី១៩ ខែកញ្ញា ឆ្នាំ២០១៧នេះ។

យោងតាមប្រភពដដែលបានឱ្យដឹងថា លោកស្រី សុុង ឆវ័ន្ត ជាតំណាងអយ្យការបានសម្រេច ចោទប្រកាន់លើឈ្មោះ កែវ វិជ្ជា ហៅ ជា ភេទប្រុស អាយុ ៣១ឆ្នាំ មុខរបរ លក់ដូរ ស្នាក់នៅផ្ទះលេខ១៥ច ផ្លូវបេតុង ក្រុម១៨ ភូមិសាមគ្គី សង្កាត់ឬស្សីកែវ ខណ្ឌឬស្សីកែវ ពីបទហិង្សាដោយចេតនាមានស្ថានទម្ងន់ទោស ប្រព្រឹត្តលើជនរងគ្រោះឈ្មោះ អ៊ុម ពិសិដ្ឋ ភេទប្រុស អាយុ៣១ឆ្នាំ មុខរបរ មន្ត្រីនគរបាលព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ កាលពីថ្ងៃទី១៤ ខែកញ្ញ ឆ្នាំ២០១៧ នៅចំណុចផ្ទះលេខ១៩៥ច ផ្លូវលំ ភូមិសាមគ្គី សង្កាត់ឬស្សីកែវ ខណ្ឌឬស្សីកែវ យោងតាមមាត្រា ២១៧ និងមាត្រា ២១៨នៃក្រមព្រហ្មទណ្ឌ នេះបើយោងតាមការបញ្ជាក់ពីសមត្ថកិច្ច។

គួររំលឹកថា សមត្ថកិច្ចខណ្ឌឬស្សីកែវ បានឃាត់ខ្លួនជនត្រូវចោទខាងលើកាលពីព្រឹកថ្ងៃទី១៥ ខែកញ្ញា ឆ្នាំ២០១៧ ក្រោយពីរូបគេ បាននាំបក្ខពួក យកប៉ាន់តែវាយក្បាលជនរងគ្រោះបែកក្បាលដេរចំនួន ៦ថ្នេរ កាលពីល្ងាចថ្ងៃទី១៤ ខែកញ្ញា ឆ្នាំ២០១៧ រួចលាក់ខ្លួនក្នុងផ្ទះ៕