ខេត្តកណ្តាល៖ ហេតុការណ៏គ្រោះថ្នាក់ចរាចរណ៍ដ៏រន្ធត់នេះ កើតឡើងនៅថ្ងៃទី២០ ខែកញ្ញា ឆ្នាំ២០១៧ វេលាម៉ោង១៤ និង៣៥នាទី នៅចំណុច ផ្លូវបេតុងចូលវត្តភ្នំធន់មន្ត(លេខ១២១០)ស្ថិតក្នុងភូមិស្វាយតានី ឃុំព្រែកគយ ស្រុកស្អាងខេត្តកណ្តាល។ មានរថយន្តម៉ាកកូរ៉ូឡា ពណ៍ឈាមជ្រូក ពាក់ផ្លាក់លេខ (ភ្នំពេញ 2A 8070) អ្នកបើកបររថយន្តមិនស្គាល់អត្តសញ្ញាណ (គេចខ្លួន) បានធ្វើដំណើីរក្នុងទិសដៅពីកើតទៅលិច លុះពេលមកដល់ចំណុចកើតហេតុក៏បានបុកជាមួយម៉ូតូមួយគ្រឿងម៉ាកហុងដា (PCX) ពណ៍ស ពាក់ផ្លាកលេខ (ភ្នំពេញ 1CI 5565) បើកបរដោយឈ្មោះ សុខ រិទ្ធ ភេទប្រុស អាយុ៣២ ឆ្នាំ មុខរបរកសិករ (មិនពាក់មួកសុវត្ថិភាព) មានទីលំនៅភូមិព្រែកថ្មី ឃុំទឹកវិល ស្រុកស្អាង ខេត្តកណ្ដាល ដែលកំពុងធ្វើដំណើរក្នុងទិសដៅពីលិចមកកើត បណ្តាលឲ្យដួលបោកក្បាលស្លាប់ភ្លាមៗតែម្ដង ។

ក្រោយពីកម្លាំងជំនាញ និងប៉ុស្តិ៍រដ្ឋបាលព្រែកគយ បានចុះពិនិត្យវាស់វែងរួច បានប្រគល់សពជូនក្រុមគ្រួសារដឹកយកទៅធ្វើបុណ្យតាមប្រពៃណី ចំណែករថយន្ត និងម៉ូតូខូចខាតធ្ងន់ ហើយបានយកមករក្សាទុកនៅអធិការដ្ឋាននគរបាលស្រុកស្អាង ដើម្បីកសាងសំណុំរឿងទៅតាមនីតិវិធី នៃច្បាប់ ។