ភ្នំពេញៈ កាលពីវេលាម៉ោង៨និង៣០នាទីព្រឹកថ្ងៃទី២៨ ខែកញ្ញានេះ សមត្ថកិច្ចប៉ុស្តិ៍ទួលសង្កែ បានឃាត់ខ្លួនស្ត្រីម្នាក់ និងបានយកមកធ្វើការអប់រំ បន្ទាប់ពីស្ត្រីខាងលើលួចកាបូបគេហើយ ត្រូវម្ចាស់ឃើញទាន់។

ហេតុការណ៍ដ៏ភ្ញាក់ផ្អើលមួយនេះ បានកើតឡើងនៅផ្សារទំនប់ ភូមិទួលគោក សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ។

ស្ត្រីខាងលើមានឈ្មោះ បាន ស្រីណែត អាយុ៤៣ឆ្នាំ មុនរបរលាងចានឲ្យគេ ស្នាក់នៅផ្ទះជួល ភូមិបាក់ទូក សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ មានស្រុកកំណើតនៅស្រុកបាធាយ ខេត្តកំពង់ចាម។

ប្រភពពត៌មានពីមត្ថកិច្ចប៉ុស្តិ៍ទួលសង្កែ បានឲ្យដឹងថា នេះជាករណីលួចកាបូបមិនបានសម្រេច ត្រូវម្ចាស់ឃើញទាន់ ក៏បានបង្កឲ្យមានការភ្ញាក់ផ្អើលដល់សមត្ថកិច្ចនៅក្បែរនោះ ក៏ហៅជនជាប់ចោទមកសាកសួរ និងអប់រំ ខណៈមិនមានវត្តមាន និងការដាក់ពាក្យបណ្តឹងពីជនរងគ្រោះ សមត្ថកិច្ចក៏បានឲ្យស្ត្រីខាងលើត្រឡប់ទៅផ្ទះវិញ៕