ព្រះសីហនុៈ ករណីគ្រោះថ្នាក់ចរាចរណ៍ដ៏រន្ធត់មួយកើតឡើង រវាងម៉ូតូនិងរថយន្ត បណ្តាលឲ្យមនុស្ស៤នាក់រងរបួសនិងស្លាប់នៅនឹងកន្លែង។

ហេតុការណ៍កើតឡើងនៅវេលាម៉ោង១២ និង១០នាទី ថ្ងៃទី២៨ ខែកញ្ញា ឆ្នាំ២០១៧ នៅលើផ្លូវជាតិលេខ៣ ចន្លោះគីឡូម៉ែត្រ១៩០-១៩១ ស្ថិតនៅក្នុងភូមិទួល ឃុំទឹកល្អក់ ស្រុកព្រៃនប់ ខេត្តព្រះសីហនុ។

មុនពេលកើតហេតុ គេមានម៉ូតូ១គ្រឿងម៉ាក ហុងដា សេ១២៥ ពណ៌ខ្មៅ ពាក់ស្លាកលេខ តាកែវ1K-1941 ជិះគ្នា៤នាក់ ក្នុងនោះមានស្ត្រីម្នាក់ ក្នុងទិសដៅពីកំពតទៅព្រះសីហនុ លុះមកដល់ចំណុចកើតហេតុខាងលើ ស្រាប់តែម៉ូតូបែកកង់រ៉េចង្កូត បណ្តាលឲ្យអ្នករួមដំណើរធ្លាក់ពីលើម៉ូតូចំនួន៣នាក់ស្រីម្នាក់ ស្របពេលមានរថយន្ត១គ្រឿងម៉ាក SSANGYONG ពណ៌លឿង ពាក់ស្លាកលេខ ភ្នំពេញ2AG-2890 ដែលបើកបរពីក្រោយ ក៏កិនក្មេងប្រុស និងក្មេងស្រី២នាក់ អូសធ្លាក់ ចូលទៅក្នុងប្រឡាយទឹកក្បែរផ្លូវ បណ្ដាលឲ្យស្លាប់ក្មេងប្រុសម្នាក់នៅនឹងកន្លែង និងរងរបួសធ្ងន់ក្មេងស្រីម្នាក់ បញ្ជូនទៅសង្គ្រោះនៅគ្លីនិកឯកជនវាលរេញផងដែរ។

ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែង និងនាំយកមធ្យោបាយទាំង២គ្រឿងដើម្បីដោះស្រាយតាមផ្លូវច្បាប់៕