ព័ត៌មានជាតិ

ឃាត់ខ្លួនជនសង្ស័យមុខសញ្ញាចោរឆក់ ០៣ នាក់ ក្រោយធ្វើ​សកម្មភាព​រួចរត់គេចខ្លួន តែមិនបានសម្រេច

ព្រះសីហនុ: កាលពីល្ងាច​ថ្ងៃទី​៣០​ ខែកញ្ញា​ ឆ្នាំ​២០១៧​ នេះ​ មានជនសង្ស័យ​៣​នាក់​ ជិះ​ម៉ូតូ​ម៉ាក​ហុងដា ​សេ​១២៥​ មួយ​គ្រឿង​ បាន​ធ្វើ​សកម្មភាព​ ឆក់​កាបូប​ នៅ​ម្តុំ​ផ្សារ​ឧតុនិយម​ សង្កាត់​លេខ​៣​ ក្រុង​ព្រះសីហនុ​។

ក្រោយ​ពី​ទទួល​​បាន​ ​ព័ត៌មាន​នេះ​ភ្លាម​ ឧត្តម​សេនីយ៍​ទោ​ ជួន​ ណា​រិន្ទ​ ស្នងការនគរបាលខេត្ត​ព្រះសីហនុ បាន​បញ្ជា​ឲ្យ​កម្លាំង​នគរបាល​ គ្រប់​មុខជំនាញ​ គ្រប់​មុខ​ព្រួញ​ទាំងអស់​ ពង្រាយ​ដេញ​ស្ទាក់​គ្រប់​ច្រកល្ហក​ ដែល​មុខ​សញ្ញា​កំពុង​រត់គេច​។

ជា​លទ្ធផល​មិន​ដល់​រយ:​ពេល​២០​នាទីផង​ កម្លាំង​នគរបាល​ព័ទ្ធ​ស្ទាក់​ចាប់​បាន​ជនសង្ស័យ នៅ​ចំណុច​ផ្លូវ​កាត់​ពី​ អូរទី១ ឡើងទៅឃ្លាំងលើ ស្ថិត​ក្នុង​សង្កាត់​លេខ​៤​ ដែល​ពួក​ជន​ល្មើស​ជិះ​ម៉ូតូ​រត់​វក់វី​គេច​ខ្លួន​ ក្នុង​ក្រុង​ព្រះសីហនុ​ ហើយ​រត់​មិន​រួច​ បាន​បោះ​បង់​ម៉ូតូ​ចោល​ ហើយ​រត់​ប្រាស​អាយូស​ រៀង​ៗ ខ្លួន​ តែ​ត្រូវ​បាន​នគរបាល​ ចាប់​បាន​ទាំង​៣​នាក់​ នៅ​វេលា​ម៉ោង​៥ និង៣០នាទីល្ងាចតែម្តង​។

ជនរងគ្រោះ​ក្នុង​ហេតុការណ៍​នេះ​ ឈ្មោះ ខុន ពិសី ភេទស្រី អាយុ២១ឆ្នាំ មុខរបរបុគ្គលិកកាស៊ីណូយ៉ាឌួលី មានទីលំនៅភូមិ១ សង្កាត់៤ ក្រុងព្រះសីហនុ ដែលសម្ភារបាត់បង់រួមមាន៖ កាបូបពណ៌ខ្មៅ១​ ទូរស័ព្ទដៃម៉ាក i-Phone 6 plus ១គ្រឿង​ និង​ លុយ ២,២០០រៀល។

តាមសមត្ថកិច្ច បានឲ្យដឹងថា មុខ​សញ្ញា​សង្ស័យ​ទាំង​៣​នាក់​ទី១. ឈ្មោះ​ង៉ាន ហាក់លី ភេទប្រុស អាយុ ១៥ឆ្នាំ មុខរបរ សិស្ស មានទីលំនៅភូមិ៣ សង្កាត់២ (អ្នកបើកបរម៉ូតូ ចារី ) ទី២.ឈ្មោះ​ និត ម៉ាណាក់ ភេទប្រុស អាយុ១៥ឆ្នាំ មុខរបរ មិនពិតប្រាកដ មានទីលំនៅភូមិ៥ សង្កាត់៣ ក្រុងព្រះសីហនុ ( អ្នក​ជិះកណ្តាលអ្នកឆក់) និងទី៣.ឈ្មោះ​ យ៉ុន សុវណ្ណយុទ្ធ ភេទប្រុស អាយុ១៦ឆ្នាំ មុខរបរ សិស្ស មានទីលំនៅ​ ភូមិ៣ សង្កាត់១ ក្រុងព្រះសីហនុ (ជិះពីក្រោយ សហចារី) ។

វត្ថុតាងចាប់បាន​រួម​មាន​ សម្ភាររបស់ជនរងគ្រោះ ដូចរៀបរាប់ខាងលើ​ និង​ម៉ូតូសេ១២៥ ស៊េរីឆ្នាំ២០១៦ ពណ៌ខ្មៅ១គ្រឿង​ ស្លាក​លេខ​ព្រះ​សីហនុ​ 1F.1799 ជាមធ្យោបាយធ្វើសកម្មភាព​៕

មតិយោបល់