ភ្នំពេញ: នារីម្នាក់បើករថយន្តហាយប្រីតមួយគ្រឿងបោះពួយយ៉ាងលឿន ជ្រុលទៅបុកម៉ូតូដែលជិះបត់ត្រឡប់ក្រោយមួយគ្រឿងទៀតចំពីក្រោយពេញទំហឹង បង្កឲ្យមានការភ្ញាក់ផ្អើលយ៉ាងខ្លាំង។

ហេតុការណ៍នេះកើតឡើងកាលពីវេលាម៉ោង៩និង២០នាទីយប់ ថ្ងៃទី១ ខែតុលា ឆ្នាំ២០១៧ ត្រង់ចំណុចខាងមុខទីបញ្ជាការកងរាជអាវុធហត្ថលើផ្ទៃប្រទេស តាមបណ្តោយផ្លូវ២៨៩ ស្ថិតក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរស២នាក់បើកបរម៉ូតូមួយគ្រឿងម៉ាក ហុងដាឌ្រីមសេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ កណ្តាល 1H-9192 ដោយធ្វើដំណើរតាមបណ្តោយផ្លូវ២៨៩ ក្នុងទិសដៅពីជើងទៅត្បូងលុះមកដល់ចំណុចកើតហេតុក៏បត់ឆ្វេងត្រឡប់ក្រោយខណ:ពេលនោះស្រាប់តែមានរថយន្តបើកមកពីក្រោយមួយគ្រឿងទៀតម៉ាក តូយូតាហាប្រីត ពណ៌ទឹកប្រាក់ ពាក់ស្លាកលេខភ្នំពេញ 2K-2269 ដែលបើកបរដោយនារីម្នាក់ ក្នុងល្បឿនបោះពួយយ៉ាងលឿន ក៏ជ្រុលទៅម៉ូតូខាងលើចំពីក្រោយពេញទំហឹងបណ្តាលឲ្យម៉ូតូរងការខូចខាតផ្នែកខាងក្រោយយ៉ាងដំណំ រីឯអ្នកបើកបររងរបួសសន្លប់ស្តូកស្តឹងម្នាក់និងរបួសស្រាលម្នាក់។ ចំណែករថយន្តរងការខូចខាតបែកកាងផ្នែកខាងមុខចំហៀងខាងឆ្វេង ភ្លាមនោះនារីដែលជានាក់បើកបររថយន្តបានរត់គេចខ្លួនបាត់ស្រមោល។

ក្រោយពេលកើតហេតុជនរងគ្រោះទាំង២នាក់ត្រូវបានសាច់ញាតិដឹកតាមម៉ូតូកង់បីយកទៅសង្គ្រោះនៅឯមន្ទីពេទ្យដោយឡែករថយន្តនិងម៉ូតូត្រូវបានសមត្ថកិច្ចជំនាញចុះធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌទួលគោកដើម្បីរងចាំធ្វើការដោះស្រាយគ្នានៅពេលក្រោយ៕