កាលពីយប់ថ្ងៃទី១ តុលា តារាចម្រៀងកញ្ញា ជាតិ សុច្ចកា ដែលត្រូវគេស្គាល់ថាជាអតីតបេក្ខនារី The Voice Cambodia 2 ហើយធ្លាក់ពីការប្រកួតនៅពាក់កណ្ដាលទីនោះ បានប្រារព្ធពិធីខួបកំណើតយ៉ាងអធឹកអធ័មនៅភោជនីយដ្ឋានវីហ្វ្រេនបឹងត្របែក ដោយមានតារាសិល្ប:យ៉ាងច្រើនកុះករចូលរួម។ អ្វីដែលគួរឲ្យចាប់អារម្មណ៍នោះ គឺនាងប្រកាសថានឹងចូលប្រឡងក្នុងកម្មវិធី The Voice ជាថ្មីម្ដងទៀត បើទោះជានាងត្រូវធ្លាក់ដូចការបង្ហាញខ្លួនក្នុងកម្មវិធីនេះកាលពីរដូវកាលទី២។
តារាវ័យ១៨ឆ្នាំរូបនេះនិយាយថា នាងមិនខ្លាចក្នុងចូលប្រឡងក្នុងកម្មវិធី The Voice រដូវកាលទី៣នោះទេ ដោយនាងប្រកាសថានឹងត្រៀមខ្លួនដាក់ពាក្យចូលប្រឡងក្នុងកម្មវិធីនេះក្នុងរដូវកាលទី៣នាពេលខាងមុខនោះផង។ យ៉ាងណាមិញ នាងថាមិនសង្ឃឹមសម្រាប់ឱកាសជាប់នោះទេ ប៉ុន្តែមកពីនាងនៅចង់បង្ហាញសមត្ថភាពក្នុងកម្មវិធីលំដាប់ថ្នាក់ពិភពលោកមួយនេះជាថ្មីម្ដងទៀត ទើបនាងត្រូវតែរៀបចំខ្លួនចូលប្រឡងក្នុងពេលខាងមុខ។ នាងថាអត់ចង់ប្រឡងក្នុងកម្មវិធី Cambodian Idol នោះទេ គឺសុខចិត្តទុកពេលចាំប្រឡងកម្មវិធីThe Voice ដែលនាងធ្លាប់មានបទពិសោធន៍ ទើបនាងមិនបានរវីរវល់ ហើយយកពេលគិតគូរតែលើអាជីពសិល្ប: និងធ្វើខួបកំណើតដែលទើបបញ្ចប់ជាជំនួសវិញ។
នាងថាការប្រឡងក្នុងកម្មវិធី The Voice 2 បានរុញឲ្យនាងមិនត្រឹមតែបានក្លាយជាតារាចម្រៀងប្រចាំហាងវីហ្វ្រេនប៉ុណ្ណោះទេ តែក៏មានសមត្ថភាពចេញចម្រៀងផ្ទាល់ខ្លួនបានមួយបទ និងបានក្លាយជាតារាសម្ដែងនៅក្នុងពិភពសម្ដែងនាពេលចុងក្រោយ។
នាងថាមានរឿងច្រើនឡើងផ្ដល់ឱកាសនាងបានសម្ដែង តែនៅមិនទាន់មានរឿងណាមួយផ្ដល់ឲ្យនាងបានសម្ដែងតួឯកនៅឡើយទេ បើទោះជានាងកាន់តែមានទីផ្សារជាងមុនទាំងការសម្ដែង និងអាជីពចម្រៀង។ នាងក៏គ្រោងបញ្ចេញបទចម្រៀងផ្ទាល់ខ្លួនក្នុងពេលបន្តបន្ទាប់ផងដែរ មុនពេលដែលនាងសម្រេចចិត្តចូលជ្រកនៅក្នុងផលិតកម្មណាមួយក្រោយពេលនាងត្រៀមខ្លួនរួចរាល់។
នាងថាមកទល់សព្វថ្ងៃគឺមានផលិតកម្មមួយចំនួនបានទាក់ទងឲ្យនាងចូលច្រៀង ប៉ុន្តែហេតុផលដែលនាងមិនទាន់សម្រេចចិត្តគឺដោយសារតែនាងនៅចង់ផលិតបទចម្រៀងផ្ទាល់ខ្លួនបង្ហោះនៅលើយូធូប ដើម្បីទាក់ទាញប្រជាប្រិយភាព និងចង់ចូលប្រឡងកម្មវិធី The Voice រដូវកាលទី៣ឲ្យចប់សព្វគ្រប់សិន។
នាងនៅតែអះអាងថាចង់មើលសមត្ថភាពរបស់ខ្លួនជាថ្មីម្ដងទៀតនៅក្នុងកម្មវិធីកម្រិតពិភពលោកមួយនេះ ដោយនាងយល់ថាបើទោះជាធ្នាក់ការប្រឡងដូចមុន ក៏ពិតជាធ្វើឲ្យមហាជនបានស្គាល់នាងកាន់តែច្រើនជាងមុនផងដែរ ក្រោយពីនាងបានក្លាយជាតារាសិល្ប:នាពេលចុងក្រោយដោយសារតែមហាជនបានស្គាល់ពីការធ្លាក់លើកនោះ។
នាងមិនចាត់ទុកថាជារឿងអាម៉ាស់នោះទេ ប្រសិនបើការប្រឡងរបស់នាងនៅក្នុងកម្មវិធី The Voice រដូវកាលទី៣នៅតែមានលទ្ធផលបរាជ័យមិនខុសមុន។
ងាកមកកាន់កម្មវិធីខួបកំណើតគម្រប់១៨ឆ្នាំកាលពីយប់មិញវិញ នាងថាធ្វើឡើងដើម្បីពង្រីកប្រជាប្រិយភាព និងដើម្បីបង្កើនទំនាក់ទំនងជាមួយតារាៗរៀមច្បងបន្ទាប់ពីនាងបានក្លាយជាតារាចម្រៀងអាជីព និងជាតារាសម្ដែង។
នៅក្នុងពិធីនោះនាងគ្រោងប្រារព្ធធ្វើតែ១០តុប៉ុណ្ណោះ ប៉ុន្តែនៅដល់ពេលកម្មវិធីជាក់ស្ដែងគឺកើនឡើងដោយ១៧តុ ដោយក្នុងពិធីនោះនាងក៏ទទួលបានកាដូពិសេសមួយដែលនាងមិនទាន់ចង់បង្ហើបជាសាធារណ:នោះផងដែរ។
តារាៗដែលបានបង្ហាញខ្លួននៅក្នុងពិធីនោះរួមមាន កញ្ញាកុល ដាវី កញ្ញាថន លក្ខិណា លោកម៉ាដូណា កញ្ញាហ៊ិន លីដា លោកសាន ផានិត កញ្ញាអោក សុម៉ាវត្តី កញ្ញានីឡា តារាកំប្លែង និងតារាប្រុសស្រីល្បីឈ្មោះជាច្រើនរូបទៀត៖
មតិយោបល់