កណ្តាល: បុរសសតិមិនគ្រប់ម្នាក់ បានផឹកស្រាស្រវឹងជោកជាំ ខឹងឆ្កែពាំសំរាមមកដាក់មុខបន្ទប់ជួល រួចដេញកាប់អ្នកជិតខាង និងវាយបំផ្លាញទ្រព្យសម្បត្តិខ្លួនឯងត្រូវនគរបាលប៉ុស្តិ៍ដើមមានធ្វើការឃាត់ខ្លួន។

ហេតុការណ៍នេះបានកើតឡើងកាលពីវេលាម៉ោង១០និង៣០នាទី ថ្ងៃទី០២ ខែតុលា ឆ្នាំ២០១៧ នៅផ្ទះជួលជិតផ្ទះសំណាក់រីករាយ ស្ថិតនៅភូមិដើមគរ សង្កាត់ដើមមាន ក្រុងតាខ្មៅ។

លោកអនុសេនៅយ៍ឯក សេង វុទ្ធី នាយប៉ុស្តិដើមមានបានប្រាប់ឲ្យដឹងថា ជនសង្សយ័មានឈ្មោះ លី លីម ភេទប្រុស អាយុ៣០ឆ្នាំ មានទីលំនៅភូមិស្វាយប្រទាល ស្រុកស្អាង ខេត្តកណ្តាល។

លោកនាយប៉ុស្តិ៍បានបញ្ជាក់ឲ្យយដឹងថា នៅមុនពេលកើតហេតុជនបង្កបានផឹកស្រាស្រវឹងជោកជាំ ហើយសតិមិនសូវគ្រប់ផង ពេលត្រឡប់មកផ្ទះវិញបានឃើញឆ្កែពាំសំរាមមកទុកចោលនៅមុខបន្ទប់ជួល ធ្វើឲ្យជនបង្កខឹងបានចាប់ឆ្កែបោក រួចយកកាំបិតនៅក្នុងបន្ទប់ជួលដេញកាប់អ្នកជិតខាងដែលកំពុងឈរមើល និងបានវាយបំផ្លាញទ្រព្យសម្បត្តិរបស់ខ្លួនខ្ទេចគ្មានសល់។ភ្លាមៗនោះកម្លាំងប៉ុស្តិរដ្ឋបាលដើមមានបានឃាត់ខ្លួនជនបង្ករមកកាន់ប៉ុស្តិ៍រដ្ឋបាល និងកំពុងកសាងសំណុំរឿងតាមនីតិវិធី៕