ភ្នំពេញ: ពិតជាគួឲ្យសង្វេគជាពន់ពេក ដោយក្មេងប្រុសម្នាក់អាយុប្រហែល៧ខែ បានបាត់បង់ជីវិតហើយអណ្តែតទឹកមកជាប់និងគុម្ពត្រែក្បែរមាត់ទន្លេ ហើយត្រូវបានបុរសអ្នកស្ទូចត្រីប្រទះឃើញមើលមុនដំបូងគាត់ស្មានថាតុក្កតាតែមើលយូរទៅគឺជាសពក្មេងប្រុស។

ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១១និង២០នាទីថ្ងៃត្រង់ថ្ងៃទី៤ ខែតុលា ឆ្នាំ២០១៧ ស្ថិតក្នុងទឹកកៀនគុម្ពត្រែងក្បែរច្រាំងទន្លេមេគង្គ ក្នុងភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។

បុរសអ្នកប្រទះឃើញសពក្មេងប្រុសអណ្តែតទឹកនោះមានឈ្មោះ ឡេង ភាព អាយុ៣៧ឆ្នាំ មុខរបរនេសាទត្រី ស្នាក់នៅភូមិកើតហេតុខាងលើ។ចំណែកសពក្មេងប្រុសនោះមិនស្គាល់អត្តសញ្ញាណឡើយ។

ប្រភពពត៌មានពីបុរសខាងលើនេះបានរៀបរាប់ឲ្យដឹងថានៅមុនពេលកើតហេតុខណ:ពេលគាត់កំពុងស្ទូចត្រីក្នុងទន្លេរនៅខាងក្រោយផ្ទះនៅវេលាម៉ោងខាងលើក៏ប្រទះឃើញសពក្មេងប្រុសខាងលើអណ្តែតទឹកកៀនគុម្ធត្រែងក្បែរមាត់ទន្លេ។

គាត់បានបន្តថាពេលមើលមុនដំបូងស្មានថាតុកុត្កតាតែពេលមើលយូរទៅទើបដឹងថាជាសពក្មេងប្រុសហើយក៏ប្រាប់គ្នីគ្នានៅក្បែរនោះមកជួយមើលនិងស្រង់ចេញពីទឹកហើយអ្នកនៅក្បែរនោះបានរាយការណ៍ប្រាប់សមត្ថកិច្ចមូលដ្ឋានឲ្យចុះមកពិនិតតែម្តង។

ក្រោយពីសមត្ថកិច្ចចុះមកពិនិត្យតាមជំនាញរួចហើយក៏ប្រគល់សពក្មេងប្រុសនោះឲ្យអ្នកភូមិយកទៅបញ្ចុះនៅក្នុងវត្តខ្ទរខណ្ឌជ្រោយចង្វារ៕