តាកែវៈ ជនសង្ស័យម្នាក់ ត្រូវបានសមត្ថកិច្ចចាប់ខ្លួនក្រោយពីបានធ្វើសកម្មភាពឆក់ខ្សែកពីស្ត្រីម្នាក់ ហើយព្យាយាមគេចខ្លួន។

ហេតុការណ៍នេះបានកើតឡើងកាលពីវេលាម៉ោង៩និង៣០នាទី ព្រឹកថ្ងៃទី៦ ខែតុលា ឆ្នាំ២០១៧ ស្ថិតនៅចំណុចភូមិត្រពាំងឈើទាល ឃុំជ្រេស ស្រុកជុំគីរី ខេត្តតាកែវ។

ជនសង្ស័យមានឈ្មោះ ស៊ុយភារ៉ា ភេទ ប្រុស អាយុ១៧ឆ្នាំ រស់នៅភូមិត្រពាំងឈើទាល ឃុំជ្រេស ស្រុកជុំគីរី ត្រូវបានកម្លាំងជំនាញអធិការដ្ឋាននគរបាលស្រុកត្រាំកក់ សហការជាមួយកម្លាំងជំនាញអធិការដ្ឋានស្រុកជុំគីរី ធ្វើការបង្រ្កាបបាន ក្រោយពីធ្វើសកម្មភាពឆក់ខ្សែ.ករបស់ជនរងគ្រោះឈ្មោះ នាក់ បូតី ភេទស្រី អាយុ២៥ឆ្នាំ រស់នៅភូមិអង្គត្រាវ ឃុំត្រពាំងធំខាងជើង​ នៅចំណុចបណ្តោយផ្លូវ លេខ១៣២អា ស្ថិតនៅភូមិព្រៃខ្វាវ ឃុំត្រពាំងខាងជើង ដកហូតវត្ថុតាងបាន ម៉ូតូម៉ាកសេ១២៥ ពណ៌ខ្មៅ ស៊េរីឆ្នាំ២០០៨ ឡើងតែម២០១៥ ពាក់ស្លាកលេខ កំពត1B-7044 ចំនួន១គ្រឿង, ផ្លាកដៃកាឡៃ១ខ្សែ ចិញ្ចៀនកាឡៃ១វង បណ្តោងខ្សែ.ក ព្រះ១ និងប្រាក់១៦០០រៀល។

បច្ចុប្បន្នជនសង្ស័យនិងវត្ថុតាងត្រូវបានសមត្ថកិច្ចកសាងសំណុំរឿងបន្តបញ្ជូនខ្លួនទៅកាន់តុលាការចាត់ការតាមនិតិវិធីច្បាប់៕