ភ្នំពេញៈ រថយន្តសង្គ្រោះបន្ទាន់របស់មន្ទីពេទ្យបង្អែកស្រុកបាធាយ ខេត្តកំពង់ចាមជួបគ្រោះថ្នាក់ចរាចរណ៍ ក្រឡាប់ផ្ងារជើង បណ្តាលឲ្យតៃកុងរងរបួសក្បាល និងស្ត្រីអ្នករួមដំណើររបួសស្រាល។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៧ព្រឹក ថ្ងៃទី៨ ខែតុលា ឆ្នាំ២០១៧ ស្ថិតនៅតាមបណ្តោយផ្លូវជាត់លេខ៦A ក្នុងភូមិខ្ទរ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។

សមត្ថកិច្ចចរាចរណ៍ដែលបានទៅដល់កន្លែងកើតហេតុ បានឲ្យដឹងថា នៅមុនពេលកើតហេតុមានរថយន្តមួយគ្រឿងម៉ាកFord EVEREST ពណ៌ស ពាក់ស្លាកលេខរដ្ឋ12 2-0832 បើកតាមបណ្តោយផ្លូវ៦A ទិសដៅពីជើងទៅត្បូង លុះមកដល់ចំណុចកើតហេតុខាងលើ ក៏បែកកង់ក្រោយផ្នែកខាងឆ្វេង ធ្វើឲ្យរថយន្តរេចង្កូតមកឆ្វេងឡើងសួនទ្រូងផ្លូវ ក្រឡាប់ផ្ងារជើងបណ្តាលឲ្យតៃកុងរងរបួសក្បាល និងស្ត្រីម្នាក់រងរបួសស្រាល។

ប្រភពពត៌មានពីស្ត្រីជាកសិករម្នាក់ ឈ្មោះគឹម សុភាព អាយុ៥៤ឆ្នាំ ស្នាក់នៅក្នុងភូមិកើតហេតុខាងលើ បានឲ្យដឹងថា មនុស្សនៅក្នុងរថយន្តទាំងអស់មានចំនួន៤នាក់ ក្នុងនោះស្ត្រីម្នាក់ បុរសតៃកុងម្នាក់ បុរសរួមដំណើរម្នាក់ និងទារកមិនគ្រប់គីឡូមួយ។
ស្ត្រីដដែលបន្តថា ឃើញរបួសតែតៃកុងទេ អ្នកផ្សេងដែលនៅក្នុងរថយន្តនោះ ដូចជាមិនឃើញមានរបួសទេ ហើយបានចេញពីកន្លែងកើតហេតុអស់ហើយ។

ក្រោយពេលកើតហេតុតៃកុងរថយន្ត ត្រូវបានដឹងទៅព្យាបាលនៅមន្ទីពេទ្យ ហើយសមត្ថកិច្ចចរាចរណ៍ខណ្ឌ បានមកដល់កន្លែងកើតហេតុ និងទាក់ទងថ្នាក់លើស្ទូចរថយន្តខាងលើ យកទៅរក្សាទុកនៅផ្នែកចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ៕