ភ្នំពេញ: ជនសង្ស័យម្នាក់ ត្រូវបានបងប្អូនប្រជាពលរដ្ឋ រួមនឹងសមត្ថកិច្ច ធ្វើការដេញតាមចាប់ខ្លួនបាន ក្រោយពីបានធ្វើសកម្មភាពឆក់ខ្សែកពីនារីម្នាក់ ដែលកំពុងជិះម៉ូតូ សណ្តោងម៉ូតូគូដណ្តឹងដែលកំពុងខូចមួយគ្រឿងទៀត បានសម្រេចហើយព្យាយាមគេចខ្លួន។

ហេតុការណ៍នេះបានកើតឡើងកាលពីវេលាម៉ោង៧និង២០នាទី យប់ថ្ងៃទី៩ ខែតុលា ឆ្នាំ២០១៧ ស្ថិតនៅតាមបណ្តោយផ្លូវលេខ ៣១៧ ជាប់សាលាឥន្ទ្រទេវី ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យដែលចាប់ខ្លួនបាននេះ មានឈ្មោះ អ៉ិត ម៉ូ ភេទប្រុស អាយុ២៦ឆ្នាំ មុខរបរជាងជួសជុលរថយន្តម្តុំរង្វង់មូលទួលគោកចាស់ បច្ចុប្បន្នស្នាក់នៅក្នុងសង្កាត់ភ្នំពេញថ្មី ខណ្ឌសែនសុខ និងមានស្រុកកំណើតនៅក្នុងឃុំទួលកែង ស្រុកត្បូងឃ្មុំ ខេត្តត្បូងឃ្មុំ បានឆក់ខ្សែក ប្លាទីន ទម្ងន់ជាង៣ជី ដែលជារបស់ជនរងគ្រោះមានឈ្មោះ ញឹម ម៉ារ៉ា ហៅនាថ ភេទស្រី អាយុ២៣ឆ្នាំ មុខរបរជាបុគ្គលិកចូលថ្មីនៅសាលារៀនមួយកន្លែង ស្នាក់នៅផ្ទះជួលគ្នានលេខ សង្កាត់ទួលសង្កែ ខណ្ឌឬស្សីកែវ មានស្រុកកំណើតភូមិ តាមាង ឃុំកោះរកា ស្រុកកំពង់សៀម ខេត្តកំពង់ចាម។ ចំណែកគូដណ្តឹងមានឈ្មោះ គឹមចាន់ ដារ៉ា។

ប្រភពពីនារីរងគ្រោះបានឲ្យដឹងថា មុនកើតហេតុគាត់បានជិះម៉ូតូមួយគ្រឿងម៉ាកឌ្រីមសង់ ស៊េរី២០០៥ ពណ៌ខ្មៅ ពាក់ស្លាកលេខ ភ្នំពេញ 1L-0556 បានចេញពីធ្វើការមកយកម៉ូតូគូដណ្តឹងខូចម៉ាកធូដេនៅនឹងសាលាមត្តេយ្យទួលគោកដើម្បីយកមកឲ្យជាងជួសជុលបានជិះសណ្តោងគ្នាពីកើតទៅលិចលុះមកដល់ចំណុចកើតហេតុខាងលើបានលេចជនសង្ស័យម្នាក់ជិះម៉ូតូមួយគ្រឿងម៉ាកវីវ៉ា ស៊េរីចាស់ ពណ៌ខ្មៅ គ្មានស្លាកលេខ បានជិះមកពីក្រោយធ្វើសកម្មភាពឆក់ខ្សែកដែលរូបគាត់ពាក់ចេញខាងក្រៅកអាវបានសម្រេចហើយបានជិះគេចខ្លួនតែត្រូវរូបគាត់បានស្រែកចោរៗដើម្បីឲ្យប្រជពលរដ្ឋជួយអន្តរាគមន៍និងបានជួយដេញជនសង្ស័យមកដល់ចំណុចផ្លូវ៣៥៣ ក្នុងសង្កាត់បឹងកក់១ ត្រូវបានប្រជាពលរដ្ឋពទ័្ធចាប់វាយបែកមុខមាត់ឡើងទ្រមខ្លួនទើបប្រគល់ឲ្យសមត្ថកិច្ចតែម្តង៕