ព័ត៌មានជាតិ

ដូនចាស់ម្នាក់ ទៅរើសដូងទុំចាស់ៗដែលជ្រុះ ស្រាប់តែរអិលជើងធ្លាក់ស្រះស្លាប់យ៉ាងអាណោចអាធ័ម

កណ្តាល: គួរឲ្យអាណិតណាស់ ដូនចាស់ឧស្សាហ៍រើសដូងទុំចាស់ៗជ្រុះម្នាក់ រអិលជើងធ្លាក់ស្រះក្បែរដើមដូងបណ្តាលឲ្យស្លាប់។

ហេតុការណ៍នេះបានកើតឡើងកាលពីវេលាម៉ោង៥ព្រឹកថ្ងៃទី១៣ ខែតុលា ឆ្នាំ២០១៧ នៅចំណុចស្រះទឹករបស់ឈ្មោះជាប ស្រី ភូមិត្រើយត្រឹង ឃុំព្រែកអំបិល ស្រុកស្អាង ខេត្តកណ្ដាល។

បើតាមលោកវរសេនីយ៍ សេង សុជាតិ អធិការស្រុកស្អាងបានឲ្យដឹងថា ជនរងគ្រោះមានឈ្មោះ ហ៊ ស្រាយ ភេទ ស្រី អាយុ៧០ឆ្នាំ មុខរបរ ជរា មានទីលំនៅភូមិត្រើយត្រឹង ឃុំព្រែកអំបិល ស្រុកស្អាង ។

សភាពនៃរឿងហេតុ: នៅថ្ងៃទី១៣ ខែតុលា ឆ្នាំ២០១៧ វេលាម៉ោង៥ព្រឹក ឈ្មោះ ជាប ស្រី បានចេញទៅបត់ជើងតូចនៅក្រោយផ្ទះក៏ឃើញភ្លើងពិលនៅលើខ្នងស្រះទឹក រួចក៏ដើរទៅមើលឃើញស្បែកជើងអណ្ដែតទឹកស្រះ ដោយមានការសង្ស័យថាយាយ ស្រាយ គាត់ធ្លាក់ទឹកព្រោះគាត់ឧស្សាហ៍មករើសដូងទំនៅទីនេះ ភ្លាមនោះក៏បានទៅប្រាប់បងប្អូនអ្នកជិតខាង ទៅមើលរួចចុះរាវក៏ប្រទះឃើញសព ហើយស្រង់ឡើងគោក រួចរាយការណ៍ឲ្យសមត្ថកិច្ច។បន្ទាប់មកកម្លាំងជំនាញស្រុក ប៉ុស្តិ៍ ក្រុមប្រឹក្សាឃុំ ភូមិ ពិនិត្យសពពុំមានស្នាកស្នាមអ្វីគួរឲ្យកត់សម្គាល់ឡើយ។ ក្រោយពីពិនិត្យរួចសពបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕

មតិយោបល់