ភ្នំពេញ: ជនសង្ស័យម្នាក់បានធ្វើសកម្មភាពគាស់បន្ទប់ជួលលួចទូរសព្ទដៃគេម្ចាស់ឃើញទាន់ស្រែកផ្អើលដល់សមត្ថកិច្ចប៉ុស្តិ៍ទួលសង្កែចុះឃាត់ខ្លួនវាយខ្នោះ។

ហេតុការណ៍ឃាត់ខ្លួននេះបានកើតឡើងកាលពីវេលាម៉ោង២និង៣០នាទីរសៀល ថ្ងៃទី១២ ខែតុលា ឆ្នាំ២០១៧ នៅចំណុចបន្ទប់ផ្ទះជួល១១ ផ្លូវលំ ក្រុម៥ ភូមិទួលសំពៅ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។

សមត្ថកិច្ចបានឲ្យដឹងថាជនសង្ស័យខាងលើមានឈ្មោះ ពៅ ពិសិដ្ឋ ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅបន្ទប់ជួល ផ្លូវលំ ភូមិសាមគ្គី សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។

ចំណែកជនរងគ្រោះមានឈ្មោះ គឹង ទីន ភេទប្រុស អាយុ៣៥ឆ្នាំ ស្នាក់នៅបន្ទប់ជួលលេខ១១B ផ្លូវលំ ក្រុម៥ ភូមិទួលសំពៅ សង្កាត់ទួលសង្កែ ខណ្ឌឬស្សីកែវ។

សមត្ថកិច្ចបានបន្តថានៅមុនពេលកើតហេតុវេលាម៉ោងប្រហែល៦និង៣០នាទីព្រឹកថ្ងៃទី១២ខែតុលាឆ្នាំ២០១៧ជនរងគ្រោះបានចាក់សោបន្ទប់ជួលរួចចេញទៅធ្វើការងាររហូតដល់ម៉ោង ២និង៣០នាទីថ្ងៃដ៏ដែល ជនរងគ្រោះក៏ត្រឡប់មកបន្ទប់ជួលវិញក៏បានប្រទះឃើញជនសង្ស័យកំពុងធ្វើសកម្មភាពរើអីវ៉ាន់ហើយលួចយកទូរសព្ទមួយគ្រឿងម៉ាកសាំសុងភ្លាមនោះជនរងគ្រោះក៏ស្រែកឆោឡោឡើងភ្ញាក់ផ្អើលដល់ប្រជាពលរដ្ឋនិងសមត្ថកិច្ចជួយអន្តរាគមន៍ឃាត់ខ្លួនជនសង្ស័យនាំមកកាន់ប៉ុស្តិ៍ធ្វើការសួរនាំនៅប៉ុស្តិ៍តែម្តង។

ក្រោយឃាត់ខ្លួនជនសង្ស័យត្រូវបានបញ្ជូនទៅផ្នែកជំនាញនៃអធិការដ្ឋារនគរបាលខណ្ឌឬស្សីកែវដើម្បីចាត់ការបន្តទៅតាមនីតិវិធី៕