ព្រៃវែង: ហេតុការណ៍គ្រោះថ្នាក់ចរាចរណ៍មួយបានកើតឡើង បន្ទាប់ពីមានមនុស្សស្រី២នាក់ម្តាយកូន ជិះម៉ូតូមួយគ្រឿង ឌុបគ្នាទិញផ្លែឈើមកទុកសម្រាប់ពិធីភ្ជាប់ពាក្យកូននៅថ្ងៃទី១៥ ខែតុលា បែរជាត្រូវរថយន្តកុងតឺន័រកិនស្លាប់ម្តាយយ៉ាងរន្ធត់។
ករណីនេះបានកើតឡើងកាលពីវេលាម៉ោង២និង២៥នាទីរសៀល ថ្ងៃទី១៤ ខែតុលា ឆ្នាំ២០១៧ នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ៦២-៦៣ ក្បែរនឹងគល់ស្ពានហ្សឹបាសា ស្ថិតក្នុងភូមិឧត្តម ឃុំព្រែកខ្សាយ(ក) ស្រុកពាមរក៍ ខេត្តព្រៃវែង ។
ស្ត្រីរងគ្រោះដែលស្លាប់បាត់បង់ជីវិតមានឈ្មោះ ជួប សុផល អាយុ៤២ឆ្នាំ និងស្ត្រីជាកូនឈ្មោះ ធី គន្ធា អាយុ២២ឆ្នាំ អ្នកទាំង២ស្នាក់នៅក្នុងភូមិព្រែកដាច់ ឃុំព្រែកដាច់ ស្រុកលើកដែក ខេត្តកណ្តាល បានជិះម៉ូតូម៉ាកឌ្រីមសង់សេ១២៥ ពណ៌ខ្មៅ ពាក់ស្លាកលេខ ភ្នំពេញ 1FL-7179ធ្វើដំណើរមកពីទិសខាងត្បូងឆ្ពោះទៅជើង ឌុបគ្នាមកទិញផ្លែឈើនៅផ្សារអ្នកលឿងដើម្បីយកទៅទុករៀបចំកម្មវិធីភ្ជាប់ពាក្យកូនស្រីនៅថ្ងៃទី១៥ ខែតុលា ឆ្នាំ២០១៧ លុះត្រឡប់មកវិញ ស្រាប់តែម៉ូតូបានបែកកង់មុខ រេចង្កូតក្រវាត់ចុះឡើងរហូតដួលបោកទាំងម៉ូតូ និងអ្នកជិះទៅលើដងផ្លូវត្រូវរថយន្តកុងតឺន័រ ពាក់ស្លាកលេខ ភ្នំពេញ 4A-0458 មកពីក្រោយ កិនចំស្ត្រីរងគ្រោះជាម្តាយធ្លាយខួរស្លាប់បាត់បង់ជីវិតនៅនឹងកន្លែងតែម្តង។ ចំណែកកូនស្រីគ្រាន់តែរបួសស្រាលតែប៉ុណ្ណោះ៕
មតិយោបល់