ភ្នំពេញ: យោងតាមប្រភពសមត្ថកិច្ចបានឲ្យដឹងថានៅម៉ោង ១១ និង៣០នាទីព្រឹកថ្ងៃទី១៧ ខែតុលា ឆ្នាំ២០១៧នេះ លោក ម៉េង តូនី ចៅក្រមស៊ើបសួរនៃសាលាដំបូងរាជធានី បានសម្រេចចេញដីកា ឃុំខ្លួនលើ ជនត្រូវចោទដែល បានបាញ់សម្លាប់សន្តិសុខម្នាក់ នៅក្នុងហាងផឹងស៊ី ក្នុងសង្កាត់ស្ទឹងមានជ័យ ជាបណ្ដោះអាសន្ន នៅពន្ធនាគារ ដើម្បីរង់ចាំបន្តនីតិវិធីនាពេលក្រោយ។
ប្រភពដដែលបានបន្ថែមថា លោក ស្រី ម៉ាកនី ជាតំណាងអយ្យការបានចោទប្រកាន់លើឈ្មោះ សាន បូរី ភេទប្រុស អាយុ ៣៨ឆ្នាំ ជាមន្ត្រីនគរបាលព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ ស្នាក់នៅផ្ទះលេខ៣១២ ក្រុម១១ ភូមិទ្រា សង្កាត់ស្ទឹងមានជ័យ ខណ្ឌមានជ័យ ពីបទ ឃាតកម្ម និងបទ កាន់កាប់ ឬដឹកជញ្ជូនអាវុធដោយគ្មានការអនុញ្ញាត យោងតាមមាត្រា ១៩៩ និងមាត្រា ៤៩០ នៃក្រមព្រហ្មទណ្ឌ។
គួររំលឹកថា កាលពីយប់ ថ្ងៃទី១៤ ខែតុលា ឆ្នាំ២០១៧ កន្លងទៅ មានករណី ឃាតកម្មមួយបានកើតឡើង ដោយផ្តើមចេញពីទំនាស់ពាក្យសម្តីក្នុងវង់ផឹកស៊ី និងច្រៀងខារ៉ាអូខេ នៅចំណុចក្នុងហាងលក់គ្រឿងក្លែមផ្លូវលំ ក្រុមទី១១ ក្នុងភូមិទ្រាល ជាប់ប៉ុស្តិ៍នគរបាលស្ទឹងមានជ័យ ខណ្ឌមានជ័យ រាជធានីភ្នំពេញ។
ក្រោយពីទាស់សម្តីគ្នារួច ជនត្រូវចោទឈ្មោះ សាន បូរី បានទៅផ្ទះយកកាំភ្លើងម៉ាក រ៉ូឡូ ទៅបាញ់លើជនរងគ្រោះឈ្មោះ ជ័យ ប៊ុនថន ភេទប្រុស អាយុ ៥០ឆ្នាំ មុខរបរ ជាសន្តិសុខផ្សារស្ទឹងមានជ័យ ស្នាក់នៅផ្ទះជួលក្នុងភូមិទ្រា សង្កាត់ស្ទឹងមានជ័យ ខណ្ឌមានជ័យ ចំនួន ៣គ្រាន់ ស្លាប់ភ្លាមៗនៅកន្លែងកើតហេតុ។
ក្រោយធ្វើសកម្មភាពរួចសមត្ថកិច្ចបាន ឃាត់ខ្លួនជនត្រូវចោទយកទៅស្នងការដ្ឋាននគរបាលរាជធានីភ្នំពេញ ដើម្បីសាកសួរ និងកសាងសំណុំរឿង ចាត់ការតាមច្បាប់៕
//youtu.be/b5r52j8-Z9M
មតិយោបល់