ភ្នំពេញៈ មានការភ្ញាក់ផ្អើលមួយបានកើតឡើង បន្ទាប់ពីមន្រ្តីយោធាម្នាក់សង្ស័យស្រវឹងស្រា ខណៈក្នុងពេលកំពុងធ្វើដំណើរស្រប ទិសគ្នាជាមួយរថយន្តកូរ៉េ១គ្រឿងសុខៗ ស្រាប់តែបន្ថែមល្បឿនជែងចុះឡើង រួចបានឈប់ស្ទាក់ពីមុខរថយន្ត និងចុះពីលើម៉ូតូស្ទុះ ទៅវាយលើយុវជនដែលជាអ្នកបើកបររថយន្តកូរ៉េនោះដោយគ្មានមូលហេតុ។ ព្រមទាំងបម្រុងរុញបញ្ចូលឲ្យរថយន្តកុងតឺន័របុកទៀត ប៉ុន្តែបានអ្នកជិតខាងនាំគ្នាឃាត់ទើបយោធាម្នាក់នោះឈប់វាយ បន្ទាប់មកនគរបាលបានចុះអន្តរាគមន៏ និងឃាត់ខ្លួនប្រគល់ជូនទៅ កងរាជអាវុធហត្ថខណ្ឌពោធិ៍សែនជ័យចាត់ការតែម្ដង។

ហេតុការណ៍នោះបានកើតឡើង កាលពីវេលាម៉ោង៦និង ២០នាទីល្ងាចថ្ងៃទី១៨ ខែតុលា ឆ្នាំ២០១៧ នៅតាមផ្លូវបេតុងភូមិថ្នល់ បំបែក សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះឈ្មោះ សុខ លាង អាយុ២១ឆ្នាំ មុខរបរបើកបររថយន្តដឹកកម្មករ ស្នាក់នៅក្នុងភូមិព្រៃទា សង្កាត់ចោមចៅ ខណ្ឌពោធិ៍ សែនជ័យ។ដោយឡែកមន្រ្តីយោធាដែលបានវាយទៅលើជនរងគ្រោះនោះឈ្មោះកែវ វិបុល អាយុ ប្រហែល៣០ឆ្នាំ មានឋានន្តរសក្ដិ អនុសេនីយ៍ទោ អត្តលេខ១៤៤៦២៦ ។

តាមប្រភព័ត៌មានបានឲ្យដឹងថា នៅមុនពេលកើតហេតុមន្រ្តីយោធារូបនោះ បានជិះម៉ូតូ១គ្រឿង ម៉ាកហុងដា ស្កូបពី ស៊េរីឆ្នាំ២០១៧ ពណ៌ស ពាក់ស្លាកលេខ ភ្នំពេញ1GQ-5054 ក្នុងទិសដៅពីកើតទៅលិច ស្របទិសគ្នាជាមួយរថយន្តកូរ៉េ១គ្រឿង ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 2S-0120 ដែលបើកបរដោយយុវជនរងគ្រោះ។ ខណៈនោះមិនដឹងថាមន្រ្តីយោធានោះខឹងនិង ជនរងគ្រោះរឿងអ្វីនោះទេ ស្រាប់តែជិះម៉ូតូជែងរថយន្តចុះឡើងៗ រួចបានទៅឈប់ពីមុខរថយន្ត និងបានរករឿងព្រមទាំងវាយទៅលើ យុវជនអ្នកបើកបររថយន្តចំនួន៤ដៃតែម្ដង មិនតែប៉ុណ្ណោះបានបម្រុងរុញជនរងគ្រោះចូលទៅក្នុងរថយន្តកុងតឺន័រថែមទៀត ប៉ុន្តែបានអ្នកជិតខាងជួយឃាត់ទាន់។

ប្រភពដដែលបានបន្តទៀតថា ពេលនោះបានបង្កឲ្យមានការភ្ញាក់ផ្អើលខ្លាំង ហើយក្រោយពេលមានហេតុការបែបនេះ កម្លាំងនគរ បាលប៉ុស្ដិ៍ចោមចៅបានចុះទៅអន្តរាគមន៍ឃាត់ខ្លួនជនដៃលដល់ នាំទៅប្រគល់ជូនកងរាជអាវុធហត្ថខណ្ឌពោធិ៍សែនជ័យ ដើម្បីសាកសួរនិងកសាងសំណុំរឿងបញ្ជូនទៅតុលការ ចាត់ការតាមផ្លូវច្បាប់៕