ភ្នំពេញៈ ជនសង្ស័យម្នាក់ ត្រូវបានសមត្ថកិច្ចចាប់ឃាត់ខ្លួនពីបទលួចម៉ូតូបានសម្រេច ហើយជិះបានពាក់កណ្តាលផ្លូវ ខណៈដែលជនសង្ស័យកំពុងធ្វើដំណើរ។

ជនសង្ស័យដែលចាប់ខ្លួនមានឈ្មោះ ឃុំ វ៉ៃ ភេទប្រុស អាយុ២០ឆ្នាំ មុខរបរកម្មករផែស្ងួតតេងឡាយ ស្នាក់នៅក្រុមហ៊ុនផែស្ងួត មានស្រុកកំណើត ភូមិ៥ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។ ចំណែកម៉ូតូ ដែលជនសង្ស័យ លួចបានសម្រេច ព្យាយាមជិះរត់គេច ម៉ាកហុងដា សេ១២៥ ស៊េរី២០១៥ ពណ៌ខ្មៅ ពាក់ស្លាកលេខ ភ្នំពេញ1CQ-9323 រីឯម្ចាស់ម៉ូតូមិនទាន់ស្គាល់អត្តសញ្ញាណនៅឡើយទេ។

តាមនគរបាលបានបញ្ជាក់ឲ្យដឹងថា ម៉ូតូដែលជនសង្ស័យលួចបានខាងលើគឺលួចចេញពីក្នុងសង្កាត់កន្ទោក ខណ្ឌពោធិ៍សែនជ័យ ដោយសមត្ថកិច្ចបានប្រកាសតាមប្រព័ន្ធវិទ្យុទាក់ទង នូវភិនភាគរបស់ម៉ូតូនិងស្លាកលេខ ធ្វើឲ្យកម្លាំងដែលឈរជើងតាមគោលដៅ ត្រួតពិនិត្យឃ្លាំមើល ស្រាប់តែនៅវេលាម៉ោងខាងលើ ប្រទះឃើញជនសង្ស័យបើកម៉ូតូ ស្លាកលេខ តាមការប្រកាសស្វែងរក ហើយត្រូវបានកម្លាំងនគរបាលឈរជើងចំណុចស្ពានអាកាសថ្មី ផ្សារដីហុយ លើផ្លូវសហព័ន្ធរុស្ស៊ី រួមជាមួយកម្លាំងនគរបាលប៉ុស្តិ៍ទឹកថ្លា ខណ្ឌសែនសុខ ប្រទះឃើញ ក៏ព័ទ្ធចាប់បាន ទាំងមនុស្សទាំងម៉ូតូនៅវេលាម៉ោង ៣និង៥០នាទីល្ងាច ថ្ងៃទី២០ ខែតុលា ឆ្នាំ២០១៧ នេះតែម្តង។

ក្រោយពីឃាត់ខ្លួនបានជនសង្ស័យ និងម៉ូតូត្រូវបានប្រគល់ជូនវិលត្រឡប់មកខណ្ឌពោធិ៍សែនជ័យវិញ ដើម្បីសាកសួរ និងកសាងសំណុំរឿងចាត់ការទៅតាមនីតិវិធី៕