ភ្នំពេញៈ ជនសង្ស័យ៦នាក់ ត្រូវសមត្ថកិច្ចប៉ុស្តិ៍ផ្សារថ្មីទី២ ឃាត់ខ្លួនបន្ទាប់ពីធ្វើសកម្មភាពឆក់កាបូបជនបរទេសមិនសម្រេច។

ហេតុការណ៍នេះ បានកើតឡើងកាលពីវេលាម៉ោង១៥និង៣០នាទី រសៀលថ្ងៃទី២២ខែតុលាឆ្នាំ២០១៧ ស្ថិតតាមបណ្តោយផ្លូវ១៤២ កែងផ្លូវ៦៧ ទល់មុខភោជនីដ្ឋានសូរិយា ក្នុងសង្កាត់ផ្សារថ្មីទី២ ខណ្ឌដូនពេញ រាជធានីភ្នំពេញ។

ជនសង្ស័យទាំងនោះ រួមមានទី១ ឈ្មោះ សុខ ហេង ភេទប្រុស អាយុ១៨ឆ្នាំ ទី២ឈ្មោះ សុខ ដា ភេទប្រុស អាយុ១៦ឆ្នាំ ទី៣ឈ្មោះ មាស ភិម ភេទប្រុស អាយុ១៥ឆ្នាំ ទី៤ឈ្មោះ ផេង លីគឹមសួរ ភេទប្រុស អាយុ១៥ និង២នាក់ទៀតភេទប្រុស មិនត្រូវបានស្គាល់អត្តសញ្ញាណនោះទេ។

ក្នុងប្រតិបត្តិការនេះដែរ សមត្ថកិច្ចដកហូតបានម៉ូតូចំនួន៣គ្រឿង Nexពីរគ្រឿង និងម៉ាកBeat មួយគ្រឿង។

ជនសង្ស័យទាំង៦នាក់ និងវត្ថុតាងម៉ូតូបីគ្រឿង ត្រូវបានសមត្ថកិច្ច ឃាត់ខ្លួនដើម្បីសាកសួរនៅប៉ុស្តិ៍ផ្សារថ្មីទី២ និងបញ្ជូនទៅផ្នែកជំនាញនៃអធិការដ្ឋាននគរបាលខណ្ឌដូនពេញ ដើម្បីចាត់ការបន្តទៅតាមនីតិវិធី៕