​តាកែវៈ នៅវេលាម៉ោង២ និង៥០នាទីរសៀល ថ្ងៃទី២៤ ខែតុលា ឆ្នាំ២០១៧ កម្លាំងជំនាញអធិការដ្ឋាននគរស្រុក ដឹកនាំដោយលោកវរសេនីយ៍ទោ យុគ សារ៉ត់ អធិការ បានដឹកនាំកម្លាំងចុះប្រតិបត្តិការនៅចំណុចជើងភ្នំចម្ការស្វាយប៉ាកខ្ជាយ ស្ថិតក្នុងភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវ នៅចំណុចគោលដៅផ្ទះពីរកន្លែងមានរក្សាទុកកញ្ឆាក្រៀមខុសច្បាប់ដូចខាងក្រោម៖
១.ចំណុចផ្ទះ របស់ឈ្មោះ នាង នីស៊ាង ភេទស្រី អាយុ២៣ឆ្នាំ ទីលំនៅភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវ រក្សាទុកកញ្ឆាក្រៀមក្នុងផ្ទះ ចំនួន១៣,៥គីឡូក្រាម ។
២.ចំណុចផ្ទះ របស់ ចៅ ថាន់លឿង ភេទប្រុស អាយុ ៣៤ឆ្នាំ នឹង ប្រពន្ធឈ្មោះ អាន់ នាងគង់ អាយុ៣០ឆ្នាំ បច្ចុប្បន្នស្នាក់នៅភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវ មានកញ្ឆារក្សាទុកក្នុងផ្ទះចំនួន៥,៥គីឡូក្រាម បន្ទាប់មកសមត្ថកិច្ចក៏បានធ្វើការឃាត់ខ្លួនសាកសួរជុំវិញបញ្ហាកញ្ឆាទាំងនេះ ដោយឈ្មោះនាង នីស៊ាង អះអាងថាកញ្ឆានេះជារបស់ឈ្មោះ ជ័យ សារីទ្ធ ( ហៅឆក ) ភេទប្រុស អាយុ២៩ឆ្នាំ ទីលំនៅភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវ បានយកមកផ្ញើខ្លួន រី ឯ ប្តីប្រពន្ធ ឈ្មោះ ចៅ ថាន់លឿង និង អាន់ នាងគង់ ក៏អះអាងថា កញ្ឆានៅផ្ទះខ្លួនឈ្មោះ ជ័យ សារីទ្ធ ( ហៅឆក ) ជាអ្នកយកមកអោយខ្លួនជួយកាន់ ហើយគេអោយតម្លៃជាលុយ២០.០០០រៀល ( ពីរម៉ឺនរៀល ) ។

បច្ចុប្បន្នកម្លាំងជំនាញកំពុងកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្ត ដើម្បីចាត់ការតាមនិតីវិធីច្បាប់៕