ព័ត៌មានជាតិ

ផ្ទុះអាវុធ​ នៅ​ក្នុង​ក្លឹ​ប​ «លុ​ច្ស​សារី​» បណ្តាល​ស្ត្រី​ម្នាក់​ រង​របួស​ភ្លៅ​ នៅខណ្ឌដូនពេញ

ភ្នំពេញ: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា ស្ត្រី​ម្នាក់​ត្រូវ​បាន​ក្រុម​ជនសង្ស័យ​២​នាក់​ ផ្ទុះអាវុធ​ចំ​ភ្លៅ​បណ្តាល​ឱ្យ​រង​របួសធ្ងន់​ នៅ​ថ្ងៃ​ទី​២៨​ ខែឧសភា​ ឆ្នាំ​២០១៩​ វេលា​ម៉ោង​០២​ និង​២០​នាទី​រំលង​អ​ធ្រា​ត្រ​ ក្នុង​ក្លឹ​ប​លុ​ច្ស​សារី​ ផ្ទះ​លេខ​៥៣​ ផ្លូវ​២១៤​ ភូមិ​៥​ សង្កាត់​បឹង​រាំង​ ខណ្ឌដូនពេញ​ រាជធានី​ភ្នំពេញ​។​

​កម្លាំង​ប៉ុស្តិ៍​នគរបាល​រដ្ឋបាល​បឹង​រាំង​ នៃ​អធិការដ្ឋាន​នគរបាល​ខណ្ឌដូនពេញ​ បាន​ទទួល​ព័ត៌មាន​ថា​ មាន​ករណី​ផ្ទុះអាវុធ​បណ្តាល​ឲ្យរ​ងរ​បួស​ នៅ​ក្នុង​ក្លឹ​ប​លុ​ច្ស​សារី​។​ ភ្លាម​នោះ​កម្លាំង​ បាន​ចុះ​ដល់​មន្ទីរពេទ្យ​កាល់​ម៉ែ​ត​ជួប​ជន​រង​គ្រោះ​ និង​បាន​បំភ្លឺ​ជា​បន្តបន្ទាប់​។​

ជន​រង​គ្រោះ​ឈ្មោះ​ នឹម​ លី​ណា​ ភេទ​ស្រី​អាយុ​២៩​ឆ្នាំ​ មុខរបរ​លក់ដូរ​ ទីលំនៅ​ផ្ទះ​លេខ​៥៣​ ផ្លូវ​៣៣៨​ សង្កាត់​ទួល​ស្វាយព្រៃ​ទី​១​ ខណ្ឌ​ចម្ការ​មន​ រាជធានី​ភ្នំពេញ​ ត្រូវ​រង​របួស​ចំ​ភ្លៅ​ខាងស្តាំ​ចំនួន​០១​គ្រាប់​ កំពុង​សម្រាក​ព្យាបាល​នៅ​មន្ទីរពេទ្យ​កាល់​ម៉ែ​ត​។​

​ជនសង្ស័យ​ចំនួន​០២​នាក់​ ភេទ​ប្រុស​ អាយុ​ប្រហែល​៣០​ឆ្នាំ​ ប្រើប្រាស់​អាវុធ​ខ្លី​មិន​ស្គាល់​ម៉ាក​ចំនួន​០២​ដើម​ (​ម្នាក់​ដើម​)​ ធ្លាប់​ទំនាក់ទំនង​ដើរ​លេង​ស្គាល់គ្នា ជាមួយ​ជន​រង​គ្រោះ​។​ ករណី​ផ្ទុះអាវុធ​ បណ្តាល​ឲ្យរ​ងរ​បួស​ផ្តើម​ចេញពី​ការ​ប្រចណ្ឌ​។​

​បច្ចុប្បន្ន​កម្លាំង​ជំនាញ​ខណ្ឌ​ កំពុង​សហការ​ជាមួយ​កម្លាំង​ស្នងការដ្ឋាន​នគរបាល​រាជធានី​ភ្នំពេញ​ ស្រាវជ្រាវ​រក​ជនសង្ស័យ​ ដើម្បី​ឈាន​ដល់​ការ​ឃាត់ខ្លួន​ផ្តន្ទាទោស​តាម​ច្បាប់​ និង​កសាង​សំណុំរឿង​​តាម​នីតិវិធី​៕

មតិយោបល់