​ឧត្តរមានជ័យៈ លោកវរសេនីយ៍ទោ ហម ភិរម្យ អធិការនគរបាលស្រុកបន្ទាយអំពិល បានប្រាប់ Post News ថា មានករណីគ្រោះថ្នាក់ចរាចរណ៍ដ៏រន្ធត់មួយ បានកើតឡើង រវាងគោយន្ត និងម៉ូតូ បណ្តាលឲ្យមានមនុស្សរងរបួសធ្ងន់និងស្រាល។

ហេតុការណ៍នេះ បានកើតឡើង កាលពីវេលាម៉ោង៩ និង១០នាទីយប់ ថ្ងៃទី៣០ ខែតុលា ឆ្នាំ ២០១៧ នៅត្រង់ចំណុចភូមិតាមាន់សែនជ័យ ឃុំគោកមន ស្រុកបន្ទាយអំពិល ខេត្តឧត្តរមានជ័យ។

តាមប្រភពពីសមត្ថកិច្ច បានឲ្យដឹងថា ជនបង្កឈ្មោះ ណាក់ ណយ ភេទប្រុស អាយុ១៨ឆ្នាំ ស្នាក់នៅភូមិឃុំកើតហេតុខាងលើ បើកបរគោយន្តកន្ត្រៃ ម៉ាកRT១២០ ពណ៌ក្រហម និងជនរងគ្រោះឈ្មោះ បើយ ថុន ភេទប្រុស អាយុ ២១ឆ្នាំ ស្នាក់នៅភូមិល្បើករិទ្ធ ឃុំអំពិល ស្រុកបន្ទាយអំពិល ខេត្តឧត្តរមានជ័យ បើកបរម៉ូតូម៉ាកវ៉េវ សេរីឆ្នាំ២០១៤ ពាក់ស្លាកលេខ ឧត្តរមានជ័យ 1C-2029។

ប្រភពដដែល បានបន្តថា មុនពេលកើតហេតុគេឃើញគោយន្ត បានបើកទៅបុកភាគីខាងម៉ូតូ បណ្តាលឲ្យភាគីខាងម៉ូតូបាក់ភ្លៅខាងឆ្វេង រួចក៏បញ្ជូនទៅសង្រ្គោះបន្ទាន់ នៅឯមន្ទីរពេទ្យខេត្ត។

ក្រោយពេលកើតហេតុ សមត្ថកិច្ច បានដកហូតវត្ថុតាងទាំងពីរ យកមករក្សាទុកនៅអធិការដ្ឋាននគរបាលស្រុក ដើម្បីរង់ចាំធ្វើការដោះស្រាយគ្នាបន្តនៅពេលក្រោយ៕

​