ពោធិ៍សាត់ៈ លោកវរសេនីយ៍ទោ ឯម រុន អធិការនគរបាលស្រុកក្រគរ បានប្រាប់Post Newsថា មានករណី ស្ត្រីម្នាក់បានមកប្តឹងសមត្ថកិច្ចថាត្រូវជនសង្ស័យម្នាក់ បានធ្វើសកម្មភាពចាប់រំលោភសេពសន្ថវៈមកលើខ្លួននាង តែជនសង្ស័យឆ្លើយថា មិនបានរំលោភនោះទេ។

ហេតុការណ៍នេះបានកើតឡើងកាលពីវេលាម៉ោង ១១និង៥០នាទីយប់ថ្ងៃទី៣០ ខែតុលា ឆ្នាំ២០១៧ ស្ថិតនៅចំណុចភូមិជីចេះ ឃុំស្នាអន្សា ស្រុកក្រគរ ខេត្តពោធិ៍សាត់។

សមត្ថកិច្ចបានឲ្យដឹងថា ជនរងគ្រោះមានឈ្មោះ ស.ថ អាយុ២៥ឆ្នាំ ស្នាក់នៅភូមិឃុំកើតហេតុខាងលើ បានមកប្តឹងសមត្ថកិច្ចថា នៅថ្ងៃខែឆ្នាំខាងលើ ជនសង្ស័យឈ្មោះ ខ្លឹម ឡេង ភេទប្រុស អាយុ៣៧ឆ្នាំ បានលួចឡើងទៅលើផ្ទះជនរងគ្រោះ រួចចាប់ជនរងគ្រោះរំលោភបានសម្រេចតែម្តង ។

ពេលទទួលបានព័ត៌មាននេះរួចមក កម្លាំងផ្នែកជំនាញ និង កម្លាំងប៉ុស្តិ៍នគរបាលស្នាអន្សា បានចុះដល់កន្លែងកើតហេតុ និងនាំខ្លួនមុខសញ្ញាខាងលើយកមកធ្វើការសាកសួរស្រង់ចម្លើយនៅអធិការដ្ឋាននគរបាលស្រុកក្រគរ តែបើតាមចម្លើយជនសង្ស័យ បានឆ្លើយថា រយ:ពេលកន្លងមកខ្លួនបានស្រឡាញ់ជនរងគ្រោះពិតមែន ហើយបានស្ទាបអង្អែលរាងកាយជនរងគ្រោះលេង។ លុះដល់យប់ថ្ងៃខែឆ្នាំ កើតហេតុខាងលើ ខ្លួនកំពុងផឹកស៊ីនៅផ្ទះ ឈ្មោះ ផល ផឹកលុះដល់យប់ជ្រៅខ្លួនក៏ត្រឡប់ទៅដេកនៅផ្ទះរបស់ខ្លួនវិញដោយមិនបានរំលោភជនរងគ្រោះនោះទេ។

បច្ចុប្បន្ន សមត្ថកិច្ចបានឃាត់ខ្លួនជនសង្ស័យ តាមបញ្ជាលោកព្រះរាជអាជ្ញា តន់ សីហតេជ ចុះថ្ងៃទី ៣១ ខែតុលា ឆ្នាំ២០១៧ វេលាម៉ោង២ និង៣៥ នាទី និងបំពេញនីតិវិធីបញ្ជូនជនសង្ស័យទៅស្នងការដ្ឋាននគរបាលខេត្តពោធិសាត់ចាត់ការតាមច្បាប់បន្តទៀត៕