ព្រះសីហនុៈ លោកវរសេនីយ៍ឯក អ៉ី សុខា ស្នងការរងនគរបាលខេត្តព្រះសីហនុ ទទួលផែនចរាចរណ៍ បានប្រាប់ Post News ថា មានករណីគ្រោះថ្នាក់ចរាចរណ៍រវាង រថយន្តម៉ាក CRV បានបុកជាមួយនឹងម៉ូតូស្មាស់ បណ្តាលឲ្យបុរសម្នាក់ស្លាប់យ៉ាងអាណោចអាធ័ម។
ហេតុការណ៍នេះកើតឡើងនៅម៉ោង៨និង៣០នាទី យប់ថ្ងៃទី២ ខែវិច្ឆិកា ឆ្នាំ២០១៧ ស្ថិតនៅចំណុចផ្លូវជាតិលេខ៤ មុខស្ថានីយប្រេងឥន្ធនៈPTT ឃ្លាំងលើ ស្ថិតនៅក្នុងភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ។
មុនពេលកើតហេតុគេឃើញរថយន្តមួយគ្រឿងម៉ាក HONDA CRV ពណ៌ទឹកប្រាក់ ពាក់ស្លាកលេខ ភ្នំពេញ 2Q-2205 បើកបរក្នុងទិសដៅពីភ្នំពេញ ឆ្ពោះមកខេត្តព្រះសីហនុ លុះដល់ចំណុចខាងលើក៏បានបុកនឹងម៉ូតូម៉ាកស៊ុយសាគីស្មាស់ ពណ៌ក្រហម គ្មានស្លាកលេខ បើកបរដោយ ឈ្មោះ គង់ ឌៀង ភេទប្រុស អាយុ៦២ឆ្នាំ មុខរបរ រត់ម៉ូតូឌុប មានទីលំនៅភូមិពូធឿង ឃុំបិតត្រាង ស្រុកព្រៃនប់ ខេត្តព្រះសីហនុ ក្នុងទិសដៅបញ្រ្ចាសគ្នាពេញទំហឹង បណ្ដាលឲ្យអ្នកបើកបរម៉ូតូស្លាប់ភ្លាមៗនឹងកន្លែងកើតហេតុតែម្តង។
ក្រោយកើតហេតុ សមត្ថកិច្ចបានធ្វើការវាស់វែង យកទៅរក្សាទុករង់ចាំដោះស្រាយគ្នាតាមផ្លូវច្បាប់។ ចំណែកសព ប្រគល់ឲ្យក្រុមគ្រួសារធ្វើបុណ្យតាមប្រពៃណី៕
មតិយោបល់