សៀមរាប: កាលពីវេលាម៉ោង ៨នាទីព្រឹកថ្ងៃទី៨ ខែវិច្ឆិកា ឆ្នាំ២០១៧ មានករណីអំពើលួចកាច់សោកម៉ូតូ របស់ជនរងគ្រោះឈ្មោះ ចាប ចិន ភេទប្រុស អាយុ៦២ឆ្នាំ នៅភូមិកូនសាត់ ឃុំត្រពាំងធំ ស្រុកប្រាសាទបាគង ខេត្តសៀមរាប។

ម៉ូតូជនរងគ្រោះ ម៉ាកC125 សេរី២០១៧ ពណ៌ខ្មៅ គ្មានស្លាកលេខ ចំណែកជនសង្ស័យឈ្មោះ ណុប វីរះ ភេទប្រុស អាយុ២៦ឆ្នាំ នៅភូមិអណ្តូងស្នាយ ឃុំអណ្តូងស្នាយ ស្រុកជើងព្រៃ ខេត្តកំពង់ចាម។

ក្រោយពេលធ្វើសកម្មភាពរួច ជនសង្ស័យបានគេចខ្លួន ជិះម៉ូតូមកទិសខាងលិចដល់ខាងជើងសាលាស្រុកប្រាសាទបាគង ត្រូវសមត្ថកិច្ចដេញតាម ពេលនោះជនសង្ស័យ ក៏បានបាញ់មកលើសមត្ថកិច្ច ចំនួន៤គ្រាប់ ទើបសមត្ថកិច្ចបានបាញ់តបដៃទៅវិញ ត្រូវជនសង្ស័យមួយគ្រាប់ចំដៃខាងស្តាំ រួចជនសង្ស័យបានរត់ចូលព្រៃ ប៉ុន្តែត្រូវបានសមត្ថកិច្ចឡោមព័ទ្ធចាប់ខ្លួនបានតែម្តង។

វត្ថុតាងដកហូតបាន រួមមានម៉ូតូខាងលើ ដែលជនសង្ស័យបានធ្វើសកម្មភាពលួចយក និងកាំភ្លើងខ្លីម៉ាកK៥៩ ចំនួន១ដើម ។

បច្ចុប្បន្នជនសង្ស័យ ត្រូវបានសមត្ថកិច្ចបញ្ជូនខ្លួន មកកាន់ការអធិការដ្ឋាននគរបាលស្រុកប្រាសាទបាគង ដើម្បីសាកសួរ និងរៀបចំសុំណុំរឿងបញ្ជូនបន្តមកការិយាល័យជំនាញ ចាត់ការតាមនិតិវិធីច្បាប់៕