ភ្នំពេញៈ រថយន្តម៉ាកព្រុសចំនួន២គ្រឿង ត្រូវបានកម្លាំមានសមត្ថកិច្ចចាប់ឃាត់ទុក ដើម្បីស្រាវជ្រាវថា តើរថយន្តមួយណាមានឯកសារត្រឹមត្រូវ និង មួយណាមិនមានឯកសារត្រឹមត្រូវនោះ ក្រោយពីម្ចាស់រថយន្តមួយគ្រឿងបានប្រទះឃើញរថយន្តដែលមានស្លាកលេខដូចគ្នាមួយគ្រឿងទៀតចតទុកនៅលើចិញ្ចើមផ្លូវ។

ហេតុការណ៍នេះបានកើតឡើងកាលពីវេលាម៉ោង ២និង៣០នាទីរសៀល ថ្ងៃទី៨ ខែវិច្ឆិកា ឆ្នាំ២០១៧ នៅចំណុចខាងមុខកន្លែងប្តូរប្រេងរថយន្តមួយកន្លែង ដែលមានទីតាំងនៅតាមបណ្តោយផ្លូវលេខ ១៦៣ ក្នុងសង្កាត់អូឡាំពិក ខណ្ឌចំការមន។

ប្រភពពីមន្ត្រីនគរបាលម្នាក់បានប្រាប់ឲ្យដឹងថា មុនពេលកើតហេតុ ២នាក់ប្តី ប្រពន្ធ បានជិះរថយន្តម៉ាកព្រុស ពណ៌ស ពាក់ស្លាកលេខ ភ្នំពេញ 2U-3108 មួយគ្រឿងរបស់ខ្លួនដែលទើបនឹងទិញពីគេបានរយៈពេលជាង១០ខែ ប៉ុណ្ណោះ លុះមកដល់ចំណុចខាងលើ ក៏ស្រាប់តែបានប្រទះឃើញរថយន្តម៉ាកព្រុស ពណ៌ស ពាក់ស្លាកលេខដូចគ្នា កំពុងតែចតទុកចោលនៅលើចិញ្ចើមផ្លូវ។ ពេលដែលបានឃើញដូច្នោះក៏បាននាំគ្នាឈប់រថយន្ត សួររកម្ចាស់រថយន្តរថយន្តម៉ាកព្រុសខាងលើ និងរាយការណ៍ប្រាប់កម្លាំងមានសមត្ថកិច្ចប៉ុស្តិ៍អូឡាំពិកឲ្យជួយឃាត់ទុក និងសួរនាំឲ្យបានដឹងច្បាស់ពីរឿងនេះផងដែរ។

ក្រោយពេលដែលធ្វើការឃាត់ទុករថយន្តម៉ាកព្រុសទាំង២គ្រឿង ដែលមានពាក់ស្លាកលេខដូចគ្នា និងរថយន្តដូចគ្នានោះយកមករក្សាទុក ដើម្បីឲ្យម្ចាស់រថយន្តទាំង២គ្រឿងបង្ហាញពីក្រដាសស្នាម ឬលិខិតដែលពាក់ព័ន្ធទៅនឹងរថយន្តរបស់ខ្លួនរៀងៗខ្លួនផងដែរ៕