ភ្នំពេញ: ករណីច្រានក្មេងប្រុសធ្លាក់ពីលើម៉ូតូនោះគឺជារឿងក្រុមជនល្មើលចូលលួចលុយផ្ទះលក់ចាប់ហួយហើយសង្ស័យម្ចាស់ទាន់ក៏ប្រតាយប្រតប់វាយ បណ្តាលឲ្យរងរបួស លុះពួកគេប្រឹងជិះគេចខ្លួនបានពាក់កណ្តាលផ្លូវក៏ធ្លាក់ពីលើម៉ូតូរងរបួសធ្ងន់តែម្តង។

ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង៣ និង៤០នាទី រសៀលថ្ងៃទី៨ ខែវិច្ឆិកា ឆ្នាំ២០១៧ នៅតាមបណ្តោយផ្លូវបេតុង ភូមិសែនសុខ២ សង្កាត់ឃ្មួញ ខណ្ឌសែនសុខ រាជធានីភ្នំពេញ។

តាមសម្តីរបស់ស្រ្តីម្នាក់ឈ្មោះ រាជ សុធន់ បានឃើញហេតុការណ៍នេះបានប្រាប់ថា មុនពេលកើតហេតុគាត់កំពុងលាងម៉ូតូនៅក្បែរចំណុចខាងលើស្រាប់តែឃើញក្រុមក្មេងស្ទាវមានគ្នា៣នាក់ជិះម៉ូតូ១គ្រឿង ម៉ាកស្កុបពី ពណ៌ស មិនចាំស្លាកលេខ ជិះឌុបគ្នាក្នុងទិសដៅពីលិចទៅកើតលុះមកដល់ចំណុចកើតហេតុ ស្រាប់តែឃើញក្មេងប្រុសនោះធ្លាក់ពីលើម៉ូតូហើយគាត់ក៏ស្រែកថាធ្វើអីនឹងពេលនោះយុវជនស្រីប្រុសក៏នាំគ្នាជិះម៉ូតូទៅបាត់ទុកក្មេងប្រុសនោះចោល។ ភ្លាមៗនោះប្រជាពលរដ្ឋហៅរថយន្តសាមុយដឹកយកទៅសង្គោះនៅមន្ទីរពេទ្យបង្អែកអន្លង់ក្ងាន ប៉ុន្តែដោយសារស្ថានភាពធ្ងន់ធ្ងរក៏បញ្ជូនទៅមន្ទីរពេទ្យគុន្ធបុប្ផាបន្ត។

តាមប្រភពពីបងប្អូនផ្ទះលក់ចាប់ហួយដែលសុំមិនបញ្ចេញឈ្មោះ បានឲ្យដឹងថា នៅមុនពេលកើតហេតុមានក្រុមក្មេងស្ទាវប្រុសស្រីចំនួន៣នាក់ ជិះម៉ូតូម៉ាកស្កុបពី ពណ៌ស មិនចាំស្លាកលេខ បានមកឈប់នៅមុខផ្ទះប្អូនរបស់គាត់ ហើយក៏មានក្មេងប្រុសម្នាក់ក្នុងចំណោម៣នាក់(ក្មេងរងគ្រោះ)បានចូលទៅលួចយកកំប៉ុងដាក់លុយបានប៉ុន្តែដោយសារម្ចាស់ផ្ទះឃើញទាន់ក៏ប្រតាយប្រតប់ដណ្តើមយកលុយបានវិញ ហើយក៏វាយបណ្តាលឲ្យរបួសហើយក្រុមជនសង្ស័យក៏រត់ឡើងជិះម៉ូតបក្ខពួកដែលឈប់ចាំនោះបំណងគេចខ្លួនលុះជិះទៅដល់កន្លែងកើតហេតុទំនងជាជនសង្ស័យអស់កម្លាំងក៏ធ្លាក់ពីលើម៉ូតូតែម្តង។ ហើយក្រុមជនសង្ស័យភ័យខ្លាចគេចាប់បានក៏ជិះម៉ូតូរត់បាត់ស្រមោល។

ក្រោយពេលកើតហេតុសមត្ថកិច្ចផ្នែកជំនាញខណ្ឌសែនសុខបានចុះមកដល់កន្លែងកើតហេតុធ្វើការត្រួតពិនិត្យនិងស្រាវជ្រាវឃើញថាក្មេងប្រុសរងគ្រោះនោះគឺជាក្រុមជនសង្ស័យដែលធ្វើសកម្មភាពចូលលួចយកលុយរបស់ប្រជាពលរដ្ឋផ្ទះលក់ចាប់ហួយពិតប្រាកដមែនតែម្ចាស់ផ្ទះដណ្តើមបានវិញ។

បន្តែដោយសារម្ចាស់ផ្ទះមិនបាត់បង់លុយកាក់ទើបមិនមានការប្តឹងផ្តល់អ្វីទេ។ ចំណែកក្មេងប្រុសដែលរបួសធ្ងន់នោះពុំស្គាល់អត្តសញ្ញាណទេ បច្ចុប្បន្នក្មេងនោះកំពុងសម្រាកព្យាបាលនៅមន្ទីរពេទ្យ៕