ភ្នំពេញៈ បន្ទាប់ពីមានករណីក្រុមជនសង្ស័យបានធ្វើសកម្មភាពប្រើអាវុធភ្ជង់ប្លន់យកម៉ូតូពីជនរងគ្រោះ និងមានករណីគាស់ផ្ទះយកម៉ូតូកាលពីយប់មិញរួចមកកម្លាំងព្រហ្មទណ្ឌខណ្ឌសែនសុខ សហការជាមួយកម្លាំង
នគរបាលប៉ុស្តិ៍រដ្ឋបាលទឹកថ្លា បានធ្វើការឃាត់ខ្លួនក្រុមជនសង្ស័យបានជាបន្តបន្ទាប់កាលពីម៉ោង១១ និង១០នាទីព្រឹក ថ្ងៃទី១០ ខែវិច្ឆិកា ឆ្នាំ២០១៧។

ទីតាំងទី១នៅចំណុចបន្ទប់ជួល ផ្លូវលំ ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ។ និងទីតាំងទី២ នៅភូមិគោកចំប៉ក់ សង្កាត់កាកាប៣ ខណ្ឌពោធិ៍សែនជ័យ រាជធានីភ្នំពេញ។

សមត្ថកិច្ចបានបញ្ជាក់ថា ជនសង្ស័យទាំង៥នាក់នោះ ទី១ឈ្មោះ សឿង សុបិន្ត ភេទប្រុស អាយុ២៧ឆ្នាំ មុខរបរ មិនពិតប្រាកដ ស្នាក់នៅផ្លូវលំភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ។ ទី២ឈ្មោះ វ៉ា បូរិន ហៅពេជ្រ ភេទប្រុស អាយុ២៧ឆ្នាំ មុខរបរ មិនពិតប្រាកដ ស្នាក់នៅផ្លូវលំភូមិផ្សារទឹកថ្លាសង្កាត់ទឹកថ្លា ខណ្ឌសែនសុខ។ ទី៣ឈ្មោះ ហេង លាងហុង ភេទស្រី អាយុ២២ឆ្នាំ មុខរបរ មិនពិតប្រាកដ ស្នាក់នៅផ្លូវលំ ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ(ទាំង៣នាក់នេះឃាត់នៅក្នុងសង្កាត់ទឹកថ្លាដកហូតបានដែកច្នៃកាច់កម៉ូតូមួយចំនួននិងម៉ូតូស្កុបពីមួយគ្រឿងគ្មានស្លាកលេខ)។ ទី៤ឈ្មោះ ជា កុយ ភេទប្រុស អាយុ៣៥ឆ្នាំ មុខរបរ មិនពិតប្រាកដ ស្នាក់នៅចំណុចបន្ទប់ជួលលេខ២២ ភូមិគោកចំប៉ក់ សង្កាត់កាកាប៣ ខណ្ឌពោធិ៍សែនជ័យ។ និង៥ឈ្មោះ ឆន ណារិទ្ធិ ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅចំណុចបន្ទប់ជួលលេខ២២ ភូមិគោកចំប៉ក់ សង្កាត់កាកាប៣ ខណ្ឌពោធិ៍សែនជ័យ។ ដកហូតបានម៉ូតូចំនួន២គ្រឿង ម៉ាកឌ្រីមសង់ ស៊េរី២០១៥ មួយគ្រឿង និងម៉ូតូ វីវ៉ា ពណ៌ខ្មៅ មួយគ្រឿង)។

សមត្ថកិច្ចបានបញ្ជាក់ប្រាប់ថា មុនឈានទៅឃាត់ក្រុមជនសង្ស័យទាំង៥នាក់ខាងលើនេះ គឺកាលពីព្រឹកថ្ងៃទី៩ ខែវិច្ឆិកា ឆ្នាំ២០១៧ សមត្ថកិច្ចបានទទួលបណ្តឹងពីយុវជនម្នាក់ឈ្មោះ អ៊ាប រដ្ឋា អាយុ២១ឆ្នាំ មុខរបរ និស្សិតស្នាក់នៅបន្ទប់ជួល ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ ថាមានចោរមួយក្រុមបានគាស់សោបន្ទប់ចូលលួចយកម៉ូតូ១គ្រឿង ម៉ាកឌ្រីមសង់ សេ១២៥ ស៊េរី២០០៨ ឡើងតែម២០១០ ពាក់ស្លាកលេខ តាកែវ1C-8497 ។ បន្ទាប់មកសមត្ថកិច្ចបានធ្វើការស្រាវជ្រាវតាមរយៈកាំមេរ៉ាសុវត្ថិភាព ក៏កំណត់មុខសញ្ញាបាន ហើយលុះដល់ព្រឹកថ្ងៃទី១០ ខែវិច្ឆិកា ឆ្នាំ២០១៧វេលាម៉ោ១១និង១០នាទីព្រឹក កម្លាំងសមត្ថកិច្ចបានសហការគ្នាចុះបង្ក្រាប២គោលដៅខាងលើ ដោយឃាត់ខ្លួនបានជនសង្ស័យប្រុសស្រី ៥នាក់ខាងលើតែម្តង។

ក្នុងនោះដកហូតសម្ភារៈល្មើសមួយចំនួននិងម៉ូតូចំនួន៣គ្រឿង ដោយឡែកម៉ូតូជនរងគ្រោះដែលពួកគេលួចយកទៅនោះត្រូវក្រុមសង្ស័យអោយបក្ខពួកម្នាក់ទៀតយកទៅលក់បាត់ហើយ។

បច្ចុប្បន្នក្រុមជនសង្ស័យទាំង៥នាក់ ត្រូវបានឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជូនទៅតុលាកានៅពេលក្រោយ។

ក្នុងនោះដែរ សមត្ថកិច្ចក៏បានអំពាវនាវសូមអោយបងប្អូនប្រជាពលរដ្ឋដែលបានបាត់ម៉ូតូសូមយកឯកសារមកផ្ទៀងផ្ទាត់នៅអធិការដ្ឋាននគរបាលខណ្ឌសែនសុខ បើឯកសារត្រឹមត្រូវ សមត្ថកិច្ចនិងប្រគល់ម៉ូតូនោះជួនបងប្អូនយកទៅប្រើប្រាស់វិញ៕