ភ្នំពេញៈ បុរស២នាក់ជិះរថយន្តឡិចស៊ីសRX៣០០ មកដល់ត្រង់ចំណុចផ្លូវបែកជាបួន រថយន្តឡិចស៊ីស៣៣០មួយគ្រឿងទៀតក៏បុកចំពីមុខបណ្តាលឲ្យរថយន្តទាំង២គ្រឿងរងការខូចខាតផ្នែកខាងមុខនៃរថយន្ត ។

ហេតុការណ៍នេះកើតឡើងកាលពីវេលាម៉ោង២និង១០នាទីរំលងអធ្រាត្រឈានចូលថ្ងៃទី១៨ ខែវិច្ឆិកា ឆ្នាំ២០១៧ ស្ថិតនៅតាមបណ្តោយផ្លូវ ២៣២កែង១២៥ សង្កាត់បឹងព្រលិត ខណ្ឌ៧មករា រាជធានីភ្នំពេញ ។

មុនពេលកើតហេតុ គេឃើញររថយន្តមួយគ្រឿងម៉ាកឡិចស៊ី៣០០ ពណ៌ទឹកមាស ពាក់ស្លាកលេខ ភ្នំពេញ 2O-3075 បើកបរដោយបុរសម្នាក់រួមដំណើរជាមួយបុរសម្នាក់ទៀតទិសដៅពីត្បូងទៅជើងស្រាប់តែមានរថយន្តមួយគ្រឿងទៀតម៉ាកឡិចស៊ីស៣៣០ ពណ៌ទឹកប្រាក់ ពាក់ស្លាកលេខ ភ្នំពេញ 2M-2442 បើកបរដោយបុរសម្នាក់ទិសដៅពីកើតទៅលិចលុះមកដល់ចំណុចកើតហេតុ ផ្លូវបែកជាបួន ក្នុងល្បឿនលឿនដូចគ្នាក៏រថយន្តឡិចស៊ីស៣៣០បុករថយន្តឡិចស៊ីស៣០០ចំពីមុខបណ្តាលឲ្យរងការខូចខាតផ្នែកខាងមុខទាំងសងខាងតែមិនបង្កឲ្យមានអ្នករងរបួសនោះទេ ។

ក្រោយពេលកើតហេតុសមត្ថកិច្ចជំនាញបានមកធ្វើការវាស់វែងយករថយន្តទាំង២យកទៅរក្សាទុកនៅអធិការដ្ឋានគរបាលខណ្ឌ៧មករាដើម្បីរង់ចាំដោះស្រាយទៅតាមនិតិវិធីនៃច្បាប់៕