ភ្នំពេញៈ ហេតុការណ៍ភ្ញាក់ផ្អើលមួយបានកើតឡើង ដោយកុមារីម្នាក់ទៅរៀនមានអាការៈចុកពោះក្អួតមិនស្រួលខ្លួន ត្រូវអ្នកគ្រូបង្រៀនតេទូរសព្ទទៅឪពុកម្តាយឲ្យយកទៅព្យាបាល តែឪពុកម្តាយខ្វះការប្រុងប្រយ័ត្នមិនបានយកកូនទៅសង្គ្រោះភ្លាមៗ រហូតកូនមានអាការៈធ្ងន់ធ្ងរ ទើបបញ្ជូនទៅមន្ទីពេទ្យតែ អកុសលកុមារីខាងលើបានស្លាប់ទៅហើយ។
ករណីនេះកើតឡើងនៅម៉ោង៧យប់ ថ្ងៃទី១៧ ខែវិច្ឆិកា ឆ្នាំ២០១៧ ភូមិព្រៃព្រីងខាងជើង សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ម្តាយក្មេងស្រីរងគ្រោះបានឲ្យដឹងថា កូនដែលស្លាប់មានឈ្មោះ ភៀន ឆេងលៀង អាយុ៩ឆ្នាំ ជាសិស្សសាលាបឋមសិក្សាហ៊ុនសែនទួលសុភាឃួន និងជាសាលាអន្តរជាតិប៊ែលធីជម្ពូវន្ត ហើយមុនពេលកើតហេតុ ម៉ោង៤រសៀល អ្នកគ្រូបង្រៀននៅសាលាបឋមសិក្សា ហ៊ុនសែនទួលសុភាឃួន បានតេទូរសព្ទមកប្រាប់ថាកូនរបស់គាត់ មិនសូវស្រួល។ បន្ទាប់មកគាត់បានឲ្យប្តីគាត់ទៅសាលាសួរនាំទៅកូនកើតអី បានជាចុកពោះ ត្រូវបានក្មេងៗមិត្តភក្តិកូនរបស់គាត់ប្រាប់ថា កូនគាត់ញ៉ាំមីកញ្ចប់ ហើយបានរត់លេងស្រាប់តែចុកពោះនិងក្អួត ទើបគាត់ឌុបកូនស្រីមកកន្លែងលក់ដូរ នៅផ្សារព្រៃទា ហើយបានលាបប្រេងកូឡា រឹតខ្លួនកូនស្រីរបស់គាត់ឲ្យដេកថែមទាំងនិយាយលេងជាមួយកូន លុះកន្លះម៉ោងក្រោយមក កូនរបស់គាត់ មានអាការៈរឹតតែធ្ងន់ធ្ងរ ក៏បញ្ជូនទៅមន្ទីពេទ្យ២៤ម៉ោងជិតផ្សារព្រៃ តែគ្រូពេទ្យមិនយកចិត្តទុកដាក់បានទុកកូនគាត់នៅខាងក្រៅមិនព្រមមើលនិងប្រាប់ឲ្យយកទៅមន្ទីពេទ្យធំ លុះធ្វើដំណើដល់ផ្លូវសហព័ន្ធរុស្សីស្ទះពេក អាការៈរឹតតែធ្ងន់ធ្ងរក៏ចូលទៅមន្ទីពេទ្យស័ងម៉ារី នៅមុខព្រលានយន្តហោះពោធិ៍ចិនតុង តែអកុសលកូនក៏ស្លាប់ទៅហើយ។
បច្ចុប្បន្នសពក្មេងរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារធ្វើបុណ្យតាមប្រពៃណី៕
https://youtu.be/-2VNxfS3qg8
មតិយោបល់