តាកែវ: កម្មការិនីម្នាក់បានស្លាប់ ខណ:បញ្ជូនដល់​មន្ទីរពេទ្យ និង៥នាក់ផ្សេងទៀតរងរបួសស្រាល បន្ទាប់រថយន្តដឹកកម្មករកម្មការិនីរោងចក្រចំនួន ១២០នាក់ បានក្រឡាប់ដោយខ្លួនឯង នៅស្រុកបាទី។

ហេតុការណ៍គ្រោះថ្នាក់នេះ បានកើតឡើង​ កាលពីវេលាម៉ោង៧យប់ ថ្ងៃទី២១ ខែវិច្ឆិកា ឆ្នាំ២០១៧ ស្ថិតនៅលើផ្លូវលំ ភូមិត្រពាំងត្រយឹង ឃុំចំបក់ ស្រុកបាទី ខេត្តតាកែវ។

រថយន្តបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3D-5123 បើកបរដោយឈ្មោះ វាល់ វន ភេទប្រុស ស្នាក់នៅភូមិ​ក្រាំងប្រទាល ឃុំដូង ស្រុកបាទី ខេត្តតាកែវ បានបើករថយន្តរ៉េចង្កូតធ្លាក់ផ្លូវ បណ្ដាលឲ្យក្រឡាប់ចូលប្រឡាយទឹក ស្លាប់កម្មករកម្មការិនីម្នាក់ និងរបួសស្រាលចំនួន៥នាក់ ដោយក្រោយកើតហេតុ តាកុងរថយន្តបង្ក បានគេចខ្លួនបាត់ស្រមោល។

កម្មការិនី​ស្លាប់ម្នាក់មានឈ្មោះ អៀត ថាត ភេទស្រី អាយុ៣០ឆ្នាំ មានទីលំនៅភូមិដូង ឃុំដូង ស្រុកបាទី ខេត្តតាកែវ ស្លាប់ខណ:បញ្ជូន ដល់មន្ទីរពេទ្យបង្អែកស្រុកបាទី រីឯកម្មការិនីរងរបួសស្រាលចំនួន៥ នាក់ទៀត រួមមាន ទី១.ឈ្មោះ សុះ ញ៉េប អាយុ៣២ឆ្នាំ មានទីលំនៅភូមិក្រាំងប្រទាល ឃុំដូង ស្រុកបាទី ខេត្តតាកែវ ទី២.ឈ្មោះ តាប់ សុខនី អាយុ៣៩ឆ្នាំ មានទីលំនៅភូមិក្រាំងប្រទាល ឃុំដូង ស្រុកបាទី ខេត្តតាកែវ ទី៣.ឈ្មោះ ជា ចាន់ អាយុ៣៦ឆ្នាំ មានទីលំនៅភូមិ​ថ្មី ឃុំត្នោត ស្រុកបាទី ខេត្តតាកែវ ទី៤.ឈ្មោះ ឈឺន សុខនា អាយុ៤០ឆ្នាំ មាន​ទីលំ​នៅភូមិថ្មី ឃុំត្នោត ស្រុកបាទី ខេត្តតាកែវ និងទី៥.ឈ្មោះ ស សៀកមួយ អាយុ​២៣ឆ្នាំ មានទីលំនៅភូមិដូង ឃុំដូង ស្រុកបាទី ខេត្តតាកែវ។

ក្រោយកើតហេតុ កម្លាំងជំនាញបានចុះធ្វើការវាស់វែង និងដកហូតរថយន្តបង្កយកទៅរក្សាទុក នៅអធិការដ្ឋាននគរបាលស្រុកបាទី ដើម្បីរងចាំធ្វើ​ការដោះ​ស្រាយ ចំណែកសាកសពជនរងគ្រោះ ត្រូវបានសម្ថកិច្ចប្រគល់ជូនក្រុមគ្រួសារយកទៅធ្វើបុណ្យ​តាម​ប្រពៃណី៕