ភ្នំពេញៈ បុរសម្នាក់បើករថយន្តស៊េរីទំនើបម៉ាកឡិចសុីស RX330 ខ្វះការប្រុងប្រយត្ន័ ជ្រុលចង្កូតទៅបុករថយន្តស៊េរីទំនើបឡង់គ្រឺស័រ ពីក្រោយដែលកំពុងឈប់ស្តុប បណ្តាលឲ្យបែកកាមេរ៉ាជាប់នឹងកាងខាងក្រោយអស់១គ្រាប់។

ហេតុការណ៍នេះកើតឡើងកាលពីវេលាម៉ោង៩និង១០នាទីយប់ថ្ងៃទី២២ ខែវិច្ឆិកា ឆ្នាំ២០១៧ ស្ថិតនៅតាមបណ្តោយផ្លូវ១៨២ ចំណុចមុខសាលាមត្តេយ្យទឹកល្អក់ ក្នុងសង្កាត់ទឹកល្អក់២ ខណ្ឌទួលគោក រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសម្នាក់ បើករថយន្តមួយគ្រឿងម៉ាកឡិចសុីស RX330 ពណ៌ទឹកប្រាក់ ពាក់ស្លាកលេខ ភ្នំពេញ 2AH-7656 បើកបរពីកើតទៅលិច លុះមកដល់ចំណុចកើតហេតុខាងលើ បានជ្រុលចង្កូតទៅបុករថយន្តម៉ាកឡង់គ្រឺស័រ​ ពណ៌ស ពាក់ស្លាកលេខ ភ្នំពេញ 2AQ-8080 ជិះដោយបុរស២នាក់ ស្របទិសដៅគ្នា ដែលកំពុងឈប់បន្តកន្ទុយគ្នានៅនឹងស្តុប បណ្តាលឲ្យបែកភ្នែកកាមេរ៉ាជាប់នៅកាងខាងក្រោយបែកអស់១គ្រាប់។

ក្រោយកើតហេតុសមត្ថកិច្ចមូលដ្ឋានបានចុះមកដល់បានឲ្យភាគីទាំងសងខាងសម្របសម្រួលគ្នាដោយខាងភាគីរថយន្តឡិចសុីសសងសំណងទៅរថយន្តឡង់គ្រឺស័រចំនួន៣៥០០ដុល្លារដើម្បីបញ្ចប់រឿងនៅនឹងកន្លែងកើតហេតុ៕