ភ្នំពេញៈ បុរសម្នាក់ជាយោធាបើករថយន្តហាយឡាក់វីហ្គូ បុកជាមួយបុរសម្នាក់ទៀត បើករថយន្តហាយឡាក់រីវ៉ូ ត្រង់ចំណុចរង្វង់មូលសម្តេចជួនណាត បណ្តាលឲ្យរងការខូចខាតទាំងសងខាង។

ហេតុការណ៍នេះកើតឡើងកាលពីវេលាម៉ោង ១០និង១០នាទីយប់ថ្ងៃទី ២៣ ខែ វិច្ឆិកា ឆ្នាំ ២០១៧ ស្ថិតនៅតាមបណ្តោយផ្លូវជិតរង្វង់មូលសម្តេចជួនណាត សង្កាត់ចតុមុខ ខណ្ឌដូនពេញ រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តមួយគ្រឿងម៉ាកហាយឡាក់រីវ៉ូ ពណ៌ស ពាក់ស្លាកលេខ ភ្នំពេញ 1AR-7891 បើកបរដោយបុរសម្នាក់ ស្រាប់តែមានបុរសម្នាក់ជាយោធាក្នុងអង្គភាពកងពលអន្តគមន៏ពិសេសលេខ១ សង្ស័យស្រវឹង យោធាក្នុងអង្គភាពកងពលអន្តគមន៍ពិសេសលេខ១ បើករថយន្តម៉ាកហាយឡាក់វីហ្គូ ពណ៌ស្ករ ពាក់ស្លាកលេខ ភ្នំពេញ 2AB-1575 ស្របទិសដៅគ្នា លុះមកដល់ចំណុចកើតហេតុក៏បានបុករថយន្តរីវ៉ូបណ្តាលឲ្យរងការខូចខាតទ្វាផ្នែកខាងឆ្វេងខាងមុខនៃរថយន្ត ហើយក៏មានរថយន្តម៉ាកព្រុសមួយគ្រឿងទៀតក៏បានដឹកអ្នកបង្កទៅបាត់ស្រមោលឈឹង ទុកឲ្យអ្នកតំណាងមកដោះស្រាយ ។

ក្រោយពេលកើតហេតុសមត្ថកិច្ចមូលដ្ឋានបានចុះមកដល់ហើយឲ្យសម្រួលគ្នា ដោយខាងអ្នកតំណាងភាគីខាងរថយន្តហាយឡាក់វីហ្គូ ចេញថ្លៃខូចខាតឲ្យខាងរថយន្តរឺវ៉ូដើម្បីបញ្ចប់រឿងនៅកន្លែងកើតហេតុ ៕