កំពង់ចាមៈ ជនសង្ស័យម្នាក់ ត្រូវបានកម្លាំងសមត្ថកិច្ចឃាត់ខ្លួន ពាក់ព័ន្ធនឹងករណីលួចរថយន្ត១គ្រឿង។

ការចុះបង្រ្កាបឃាត់ខ្លួននៅវេលាម៉ោង១និង២០នាទីយប់ រំលងអធ្រាត្រ ឈានចូលថ្ងៃទី២៤ ខែវិច្ឆិកា ឆ្នាំ២០១៧ នៅចំណុចមុខផ្ទះឈ្មោះ អ៊ឹម សារិន ភេទប្រុស អាយុ៥៤ឆ្នាំ នៅភូមិត្រពាំងក្រសាំង ឃុំត្រពាំងព្រះ ស្រុកព្រៃឈរ ខេត្តកំពង់ចាម។

រថយន្តដែលត្រូវជនសង្ស័យលួចទៅ ម៉ាកសាំយ៉ុង ពណ៌លឿង ពាក់ស្លាកលេខ ភ្នំពេញ2AE.0610 ជាកម្មសិទ្ធរបស់ឈ្មោះ អ៊ឹម សារិន នៅភូមិទួលពោនឃុំមៀន ស្រុកព្រៃឈរ ដែលមកសង់ផ្ទះរស់នៅក្នុងភូមិកើតហេតុខាងលើ ខណៈដែលជនរងគ្រោះទុករថយន្តសាំយ៉ុង២គ្រឿងនៅនឹងមុខផ្ទះគ្មានរបង។
ហើយជនសង្ស័យបានលួចបើករថយន្តចេញតាមបណ្តោយផ្លូវជាតិលេខ៧ ឆ្ពោះទៅទិសខាងលិច។

ក្រោយពីទទួលបានព័ត៌មានបានភ្លាម កម្លាំងអធិការនគរបាលស្រុកព្រៃឈរ បានសហការជាមួយ កម្លាំងអធិការនគរបាលស្រុកបាធាយ
ដេញតាមពីក្រោយនឹងតេទូរសព្ទត្រៀមស្ទាក់ចាប់រហូតដល់ចំណុចមុខអធិការដ្ឋាននគរបាលស្រុកបាធាយ ត្រូវបានកម្លាំងស្រុកបាធាយ
ទើបឃាត់រថយន្តបាននិងចាប់ឃាត់ខ្លួនជនសង្ស័យបានម្នាក់ឈ្មោះ ហេង សុជាតិ ភេទប្រុស អាយុ៣៧ឆ្នាំ ស្រុកកំណើតភូមិថ្មី ឃុំក្សាមស្រុករលាប្អៀរ ខេត្តកំពង់ឆ្នាំង។

ជនសង្ស័យមានមុខរបរ រត់ម៉ូតូកង់បី ស្នាក់នៅខណ្ឌដង្កោ រាជធានីភ្នំពេញ។

បច្ចុប្បន្នជនសង្ស័យត្រូវបានកម្លាំងជំនាញបាននាំមកអធិការដ្ឋាននគរបាលស្រុកព្រៃឈរ សាកសួរកសាងសំណុំរឿងចាត់ការតាមនីតិវិធីច្បាប់៕