ភ្នំពេញៈ បុរសម្នាក់ខណៈពេលដែលកំពុងជិះម៉ូតូតែឯង គ្រាន់តែឃើញកម្លាំងនគរបាលកំពុងជិះល្បាតពួនស្ទាក់ការពារបទល្មើសនៅក្នុងមូលដ្ឋាន ស្រាប់តែដោះអាវក្រវែងចោលរួចព្យាយាមរត់គេចខ្លួនប៉ុន្តែត្រូវបានសមត្ថកិច្ចដេញតាមចាប់ខ្លួនបាន និងឆែកឆេរឃើញថ្នាំញៀន១កញ្ចប់តូចផងដែរ បន្ទាប់មកបាននាំទៅសាកសួរ នៅប៉ុស្តិ៍រដ្ឋបាលតែម្តង។
ការចាប់ខ្លួននោះបានធ្វើឡើងនៅវេលាម៉ោង៨ និង៣០នាទីយប់ ថ្ងៃទី២៧ ខែវិច្ឆិកា ឆ្នាំ២០១៧ នៅជិតផ្លូវរថភ្លើងខ្សែភ្នំពេញ-កំពត ស្ថិតនៅក្នុងភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យខាងលើនោះឈ្មោះ ជា តុលា អាយុ២៣ឆ្នាំ ភេទប្រុស ស្នាក់នៅផ្ទះជួល ក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ និងមានស្រុកកំណើតនៅក្នុងភូមិបឹង ឃុំឈើកាច់ ស្រុកបាភ្នំ ខេត្តព្រៃវែង។
សមត្ថកិច្ចបានឲ្យដឹងថា នៅមុនពេលកើតហេតុកម្លាំងនគរបាលប៉ុស្តិ៍ត្រពាំងក្រសាំងបានចេញល្បាតពួនស្ទាក់បទល្មើសនៅក្នុងមូលដ្ឋានរបស់ខ្លួន ហើយក្រោយពីដើរល្បាតនៅកន្លែងផ្សេងៗរួច កម្លាំងបានបន្តទៅល្បាតនៅចំណុចខាងលើនោះទៀតព្រោះមានការសង្ស័យនៅត្រង់ចំណុចជិតផ្លូវរថភ្លើងខាងលើនោះមានការជួញដូរគ្រឿងញៀនយូរមកហើយ។ ពេលនោះកម្លាំងបានទៅល្បាតកាត់តាមនោះ និងធ្វើការតាមឃ្លាំមើលសកម្មភាពផ្សេងៗរបស់ក្រុមសង្គមងងឹតផងដែរ លុះពេលទៅដល់បានជួបយុវជនសង្ស័យកំពុងជិះម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ព្រៃវែង 1I-3180។ចេញពីចំណុចខាងលើលើ គ្រាន់តែបានឃើញកម្លាំងនគរបាលភ្លាម ស្រាប់តែជននេះបានដោះអាវក្រវែងចោល ដែលការដោះអាវនោះគឺ មិនបានដោះស្រួលបួលនោះឡើយ គឺទាញទាំងបង្ខំបណ្ដាលឲ្យដាច់ឡេវ តែម្ដង។ បន្ទាប់មកបានព្យាយាមរត់គេចខ្លួន ប៉ុន្តែរត់មិនរួចឡើយ ដោយត្រូវបានកម្លាំងតាមចាប់ខ្លួនបាន និងឆែកឃើញមានថ្នាំញៀន១កញ្ចប់នៅជាប់ខ្លួន និងសង្ស័យមានច្រើនកញ្ចប់ទៀតដែលបោះចោលជាមួយអាវ។ បន្ទាប់មកបាននាំទៅសាកសួរនៅប៉ុស្ដិ៍ដើម្បីចាត់ការតាមច្បាប់ និងបន្តទៅស្វែងរកចាប់ខ្លួនបក្ខពួកដែលនៅសល់ច្រើននាក់ទៀតមកចាត់ការតាមក្រោយ៕
មតិយោបល់