កំពតៈ បុរសម្នាក់បានយកដំបងវាយទៅលើក្បាលម្តាយក្មេករបស់ខ្លួន បណ្តាលឲ្យរងរបួសធ្ងន់ធ្ងរ ខណៈដែលជនសង្ស័យបានផឹកស្រាស្រវឹង រួចបង្កជម្លោះដល់ក្រុមគ្រួសារ។

ហេតុការណ៍នេះបានកើតឡើង កាលពីថ្ងៃទី១ ខែធ្នូ ឆ្នាំ២០១៧ វេលាម៉ោង១២និង១៥នាទីយប់ រំលងអធ្រាត្រ ឈានចូលថ្ងៃទី២ ខែធ្នូ ឆ្នាំ២០១៧ ស្ថិតក្នុងភូមិអន្លង់ថ្ងាន់ ឃុំឫស្សីស្រុកខាងកើត ស្រុកកំពង់ត្រាច ខេត្តកំពត។

ជនសង្សយ័មានឈ្មោះ សុវណ្ណ ឡាន់ ភេទប្រុស អាយុ៣៧ឆ្នាំ និងជនរងគ្រោះមានឈ្មោះ ជ្រី ណែត ភេទស្រី អាយុ៦០ឆ្នាំ ត្រូវជាម្តាយក្មេករបស់ជនសង្ស័យ ទាំងពីរនាក់ស្នាក់នៅភូមិឃុំកើតហេតុខាងលើ ហើយមានផ្ទះឃ្លាតពីគ្នាចម្ងាយប្រហែល៣ម៉ែត្រ។

ប្រភពដដែល បានបន្តថា មុនពេលកើតហេតុ ជនសង្ស័យបានផឹកស្រាស្រវឹង លុះពេកត្រឡប់មកផ្ទះបានបង្កជម្លោះជាមួយប្រពន្ធរបស់ខ្លួន ខណៈនោះត្រូវជនរងគ្រោះ ជាម្តាយក្មេកបានទៅជួយឃាត់ដើម្បីកុំឲ្យមានជម្លោះ តែជនសង្ស័យមិនស្តាប់ ព្រមទាំងយកដំបងឈើវាយត្រូវក្បាលជនរងគ្រោះជាម្តាយក្មេក បណ្ដាលឲ្យរងរបួសធ្ងន់(សន្លប់)ភ្លាមៗតែម្តង រួចបញ្ជូនទៅសង្រ្គោះបន្ទាន់ នៅមន្ទីរពេទ្យប្រទេសវៀតណាម។ ចំណែកជនសង្ស័យបានគេចខ្លួនបាត់ភ្លាមៗពីកន្លែងកើតហេតុ។

បច្ចុប្បន្ន សមត្ថកិច្ចកំពុងធ្វើការស៊ើបអង្កេត ដើម្បីបន្តនីតិវិធីក្នុងការឃាត់ខ្លួនជនសង្ស័យ មកធ្វើការដោះស្រាយបន្តតាមផ្លូវច្បាប់៕