ភ្នំពេញៈ គ្រោះថ្នាក់ចរាចរណ៍មួយបានកើតឡើង បន្ទាប់ពីយុវជន៣នាក់ បានជិះម៉ូតូឌុបគ្នាក្នុងល្បឿនលឿន រេចង្កូតទៅបុកនឹង​រនាំង​ថ្មពុះចែកទ្រូងផ្លូវពេញទំហឹងបណ្តាលឲ្យយុវជនម្នាក់របួសធ្ងន់ និង២នាក់ទៀតរងរបួសស្រាល ។ ហេតុការណ៍នេះបានកើតឡើងកាលពីវេលាម៉ោង ១១និង១០នាទីយប់ ថ្ងៃ៦ ខែតុលា ឆ្នាំ ២០១៦ ស្ថិតនៅចំណុចស្តុបអូឡាំពិក តាមបណ្តោយផ្លូវព្រះសីហនុ ក្នុងសង្កាត់វាលវង់ ខណ្ឌ៧មករា រាជធានី​ភ្នំពេញ។

យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញយុវជនទាំង៣នាក់ខាងលើ ជិះម៉ូតូមួយគ្រឿងម៉ាក ស៊ុយ​សាគីនិច ពណ៌ស បិទតែមពណ៌ទឹកប៊ិច ពាក់ស្លាកលេខ ភ្នំពេញ 1FV-5820 ឌុបគ្នា ជិះតាមបណ្តោយផ្លូវព្រះសីហនុ ក្នុងល្បឿនលឿន ទិសដៅពី​កើតទៅលិច ខណៈមកដល់ចំណុចផ្លូវកោងស្តុបអូឡាំពិក មិនព្រមបន្ថយល្បឿន ក៏ជ្រុលចង្កូតទៅបុកនឹងរបាំងថ្មពុះចែកទ្រូងផ្លូវយ៉ាងពេញទំហឹង បណ្តាល​ឲ្យម៉ូតូនិងមនុស្សហោះ ខ្ទាត់ចេញពីគ្នាជាង២០ម៉ែត្រ ធ្វើឲ្យយុវជនដែលជាអ្នកបើកបរម៉ូតូរងរបួសធ្ងន់ ចំណែកអ្នករួមដំណើរនៅខាងក្រោយ​២នាក់​ទៀត រងរបួសស្រាល ។

ក្រោយពីហេតុការណ៍នេះបានកើតឡើង សមត្ថកិច្ចនគរបាលចរាចរណ៍មូលដ្ឋាន បានចុះមកធ្វើការពិនិត្យនិងវាស់វែងដល់កន្លែងកើតហេតុ ប៉ុន្តែ​ដោយសារតែករណីនេះបង្កឡើងដោយខ្លួនឯង ទើបសមត្ថកិច្ចនាំយកម៉ូតូរបស់យុវជនខាងលើ យកមករក្សាទុកនៅអធិការដ្ឋាននគរបាលខណ្ឌ៧មករា ដើម្បីរង់ចាំគ្រួសារមកទទួលយកទៅវិញ ចំណែកអ្នករងរបួសទាំង៣នាក់ ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យភ្លាមៗផងដែរ ៕