ភ្នំពេញ: ជនសង្ស័យម្នាក់ត្រូវបានកម្លាំងសមត្ថកិច្ចប៉ុស្តិ៍ទួលសង្កែ បានធ្វើការឃាត់ខ្លួន ក្រោយពីរូបគេបានធ្វើសកម្មភាពលួចកាច់កម៉ូតូ កាលពីវេលាម៉ោង ៧និង៤០នាទីព្រឹក ថ្ងៃទី១០ ខែមិថុនា ឆ្នាំ២០១៦ ដែលស្ថិតនៅចំណុចផ្ទះលេខ៧៤២ ផ្លូវលេខ៦២ ក្រុមទី៤ ភូមិផ្សារតូច សង្កាត់ទួលសង្កែ ខណ្ឌឫស្សីកែវ។
ជនសង្ស័យឈ្មោះ ឡា សុខឡេង ភេទប្រុស អាយុ ១៨ឆ្នាំ មុខរបរមិនពិតប្រាកដ ស្នាក់នៅសង្កាត់ផ្សារកណ្តាល២ ខណ្ឌដូនពេញ មានស្រុកកំណើតនៅភូមិស្ពឺ ឃុំស្ពឺ ស្រុកចម្ការលើ ខេត្តកំពង់ចាម ចំណែកឯជនរងគ្រោះឈ្មោះ អ៊ឹង ថង ភេទប្រុស អាយុ ៣៩ឆ្នាំ មុខរបរ ជួសជុលនាឡឹការ ស្នាក់ផ្ទះកើតហេតុខាងលើ។
ប្រភពព័ត៌មានពីសមត្ថកិច្ចបានប្រាប់ឲ្យដឹងថា នៅមុនពេលកើតហេតុ ជនរងគ្រោះបានទុកម៉ូតូនៅក្នុងផ្ទះ ហើយកំពុងតែរៀបចំងូតទឹក ខណ:ពេលនោះ ជនរងគ្រោះបានមើលនៅក្នុងកាមេរ៉ាសុវត្ថិភាព ក៏បានឃើញជនសង្ស័យ យកកូនសោរម៉ូតូពីក្នុងខោប៉ៅ យកមកចាក់កាច់កម៉ូតូ មួយគ្រឿង ម៉ាក HONDA C125 ពណ៌ខ្មៅ ភ្នំពេញ 1AP-5450 ក្រោយមកជនរងគ្រោះបានចេញពីក្នុងផ្ទះ ដើម្បីចាប់ឃាត់ខ្លួនជនសង្ស័យ ពេលនោះ សមត្ថកិច្ចបានមកដល់ ហើយបានជួយអន្តរាគមន៍នាំយកសង្ស័យ និងវត្ថុតាងកូនសោរម៉ូតូ ០២ យកមកប៉ុស្តិ៍ ដើម្បីធ្វើការសាកសួរ។
បច្ចុប្បន្ន ជនសង្ស័យខាងលើ ត្រូវបានសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿង បញ្ជូនទៅកាន់តុលាការ ចាត់ការតាមនីតិវិធីច្បាប់៕
មតិយោបល់