ភ្នំពេញៈ ម្សិលមិញនេះ រូបអាក្រាត​របស់ វ៉ាន់ នីឡា ត្រូវបានចែកចាយពេញទំហឹងនៅលើបណ្តាញសង្គមហ្វេសប៊ុក និងតាមបណ្តាល​​គេហទំព័រ​មួយចំនួន ប៉ុន្តែ លោក សុះ ម៉ាច ប្រធាន​សមាគមសិល្បករ​កម្ពុជាថា ការចែករំលែក និងផ្សព្វផ្សាយ​រូបភាពអាក្រាតនាង គឺដូចជាជាន់ពន្លិចនាង ហើយសូមឲ្យអ្នកប្រព្រឹត្តិនូវ​អំពើ​អសីលធម៌នេះ បញ្ឈប់ទៅ​។​

ទន្ទឹមជាមួយនឹងការចែកចាយរូបអាក្រាតតារាចម្រៀង វ៉ាន់ នីឡា ផលិតកម្ម​ភ្លេងរីខដស៍ នៅម្សិលមិញ កវីនិពន្ធ សុខ​ ជំនោរ ត្រូវជាបងប្រុសនាង បានសរសេរនៅលើហ្វេសប៊ុកថា សូ​មប្រ​កា​ស​រ​ក​ម្ចា​ស់​ ​រឺ​ ​A​d​m​​i​n​ ​P​a​g​e​ ​T​V​2​4​H​D​-​H​o​t​ ​n​​e​w​s​ ។
ក្រោយប្រកាស ផេកហ្វេសប៊ុកមួយនេះ​ ត្រូវបាន Removed ចោល ដើម្បីបំបាត់ភស្តុតាង គេចចេញពីសំណាញ់ច្បាប់។​
កវីនិពន្ធ សុខ​ ជំនោរ បានប្រាប់ដល់ព័ត៌មាន​ក្នុងស្រុកមួយថា «រកតម្រុយ​ និងភស្តុតាង​ចាត់ការបានហើយ​» ក្រោយពី​អ្នកគាំទ្រ បានផ្ញើ​ភស្តុតាង​ពីគណនីដែលផុសរូប​ទាំងនោះ។​

លោក សុះ ម៉ាច ប្រធាន​សមាគមសិល្បករ​កម្ពុជា បានប្រាប់ដល់ Post News នៅរសៀលថ្ងៃទី​១០ ខែមិថុនា ឲ្យដឹងថា «ប្អូនស្រីគេ ប្អូនស្រីយើង បងស្រីគេ បងស្រីយើង​ សូមឲ្យអ្នកកំពុងតែ​ ប្រព្រឹត្តិនូវ​អំពើ ដែលខុសសីលធម៌នេះ ប្រាស់នូវ​សេចក្តីថ្លៃថ្នូរ និងសីលធម៌ ឲ្យគាត់ពិចារណាឡើងវិញ សូមបញ្ឈប់នូវការ​ Share ជាបន្ទាន់ទៅ» ។​

ប្រធាន​សមាគមសិល្បករ​កម្ពុជាខាងលើបានបន្តថា ​«ស្ត្រីភេទ ងាយនឹងរងគ្រោះ​ ហើយយើងព្យាយាម​នៅបន្តធ្វើដូចចឹងទៀត ប្រៀបដូចជា​យើង​ជាន់ពន្លិចគ្នាខ្លាំងថែមទៀត កាន់តែធ្វើឲ្យនាងកាន់តែបាក់ទឹកចិត្តខ្លាំង ខូ​ច​អារម្មណ៍ ខូច​ទឹកចិត្ត​ ដូច្នេះសូមពិចារណាឡើងវិញ នូវ​អំពើ Share រូប​អាសអាភាស​តារាចម្រៀងខាងលើ​» ។​

លោក សុះ ម៉ាច ក៏បានអំពាវនាវ​ឲ្យ សិល្បករ​ សិល្បការិនី និងប្រិយមិត្តក្រៅរង្វង់សិល្បៈក្នុងការប្រើប្រាស់ហ្វេសប៊ុក​ សូម​កុំទុកចិត្តឲ្យសោះ នរណាក៏ដោយ​ ទោះបីសង្សារ ប្តីប្រពន្ធក៏ដោយ ព្រោះថារឿងនេះវាមិនទៀង ដូចជា​រឿងបែកធ្លាយ​ចឹងទៅ វាប៉ះពាល់ដល់កិត្តិយស​រង្វង់គ្រួសារ និង​សាមីខ្លួនតែម្តង​ ហើយសូមឲ្យប្រុងប្រយ័ត្នកុំធ្វើឲ្យហួសសីលធម៌​ ប្រពៃណីខ្មែរយើង៕​