Post News Media ព័ត៌មានជាតិ ចិន នៅតែបន្តជ...

ចិន នៅតែបន្តជួយដល់កម្ពុជាលើគ្រប់វិស័យ

ភ្នំពេញ: នៅក្នុងជំនួបសម្តែងការគួរសម និងជម្រាបលា លោក​ឧបនាយករដ្ឋមន្ត្រី យឹម ឆៃលី ប្រធាន​​ក្រុមប្រឹក្សាស្តារអភិវឌ្ឍន៍វិស័យកសិកម្ម និង​ជនបទ ក្នុងឱកាសបញ្ចប់​បេសកកម្មការទូត​នៅ​កម្ពុជា​ លោកស្រី​ ប៊ូ ជៀងគួ ឯកអគ្គរដ្ឋទូតសាធារណរដ្ឋប្រជាមានិតចិន ប្រចាំកម្ពុជា បានមាន​ប្រសាសន៍ថា ចំណងមិត្តភាព និងកិច្ចសហប្រតិបត្តិការរវាងកម្ពុជា ​និងចិនកាន់តែត្រូវបានពង្រឹង ​និងពង្រីកឥតឈប់ឈរ ហើយចិននៅតែបន្តជួយដល់កម្ពុជាលើគ្រប់វិស័យ ពិសេសវិស័យសេដ្ឋកិច្ច ពាណិជ្ជកម្ម កសិកម្ម និងហេដ្ឋារចនាសម្ព័ន។

ជំនួបនេះធ្វើឡើងនៅទីស្តីការគណ:រដ្ឋមន្ត្រី កាលពី​ព្រឹក​ថ្ងៃទី១ ខែសីហា ឆ្នាំ២០១៦ ដោយមានការចូលរួមពីលោក​ ងី ច័ន្ទ្រផល រដ្ឋលេខាធិការ​ក្រសួងមហាផ្ទៃ និងថ្នាក់ដឹកនាំ ក្រុមប្រឹក្សាស្តារអភិវឌ្ឍន៍វិស័យកសិកម្ម និង​ជនបទជាច្រើនរូបទៀត។

លោកស្រី​បន្តថា​ ប្រទេសយើងទាំងពីរតែងតែជួយគ្នាទៅវិញទៅមក ពិសេសថ្នាក់ដឹកនាំ​កំពូលៗ​ នៃប្រទេសទាំងពីរតែងផ្លាស់ប្តូរដំណើរទស្សនកិច្ចគ្នា ក្នុងនោះមានទាំង លោក​ ឧបនាយក​រដ្ឋមន្ត្រី យឹម ឆៃលី ផងដែរ។

លោកស្រីបន្តទៀត​ថា ​ប្រទេសចិនបានជាប់ចំណាត់ថ្នាក់ទី១ លើការ​វិនិយោគ​នៅកម្ពុជា ហើយទំហំពាណិជ្ជកម្មរវាងកម្ពុជា និងចិន កាលពីក្នុងឆ្នាំ២០១៥ បានកើន​រហូត​ដល់​ជាង ៤ពាន់៤រយ​លានដុល្លារអាមេរិក ហើយកាលពីពីរឆ្នាំកន្លងទៅ​ ចិនបានបញ្ជាទិញអង្ករពីកម្ពុជា​ចំនួន​២០ម៉ឺនតោន ​​ទៅ​ថ្ងៃអនាគតចំនួននេះ នឹងកើនឡើងថែមទៀត។ ម្យ៉ាងទៀត តាមរយ:​គោល​នយោបាយខ្សែរក្រវាត់១ ផ្លូវ១ កាន់តែធ្វើឲ្យអ្នកវិនិយោគចិនចាប់អារម្មណ៍ដល់កម្ពុជា។

លោក​ស្រី​បញ្ជាក់​ថា រោងចក្រផលិត​ស្ករស នៅខេត្តព្រះវិហារ គឺជាការវិនិយោគដ៏ធំមួយរបស់ចិន ហើយ​សង្ឃឹមថា វានឹងក្លាយជាគំរូ​មួយ ​នៃ​ការវិនិយោគរបស់ចិននៅកម្ពុជា។ ជាមួយគ្នានេះ ស្ថានទូតចិន​ក៏បានប្រមូល​អ្នកវិនិយោគចិនលើផ្នែក​កសិកម្ម​នៅ​កម្ពុជា​ទាំងអស់ ដើម្បីបង្កើតជាសមាគម​កសិកម្មចិន​នៅ​កម្ពុជា ​ក្នុងគោលបំណងជួយដល់​ប្រជាកសិករ​ខ្មែរ លើការជ្រើសរើសពូជ បង្កាត់ពូជដំណាំ និងការ​កែ​ច្នៃ​សម្រាប់​នាំចេញ។ ទន្ទឹមនឹងនេះ ចិន​ក៏​បាន​បង្កើតសកលវិទ្យាល័យកសិកម្ម​មួយ នៅខេត្តក្រចេះ ​ក្រោម​កិច្ចសហការរវាងក្រសួងអប់រំ យុវជន និង​កីឡា និងខេត្តក្វាងស៊ី ​បានបង្កើតមជ្ឈមណ្ឌល​កសិកម្ម​គំរូមួយនៅភ្នំពេញ ​ក្រោមកិច្ច​សហប្រតិបត្តិការ​ជាមួយក្រសួងកសិម្ម រុក្ខាប្រមាញ់ និងនេសាទ​។ លោក​ស្រី​បញ្ជាក់ទៀតថា តាងនាមឲ្យរដ្ឋាភិបាល និង​ប្រជាជន​ចិន​ សូមថ្លែងអំណរគុណយ៉ាង​ជ្រាល​ជ្រៅដល់​រាជរដ្ឋាភិបាលកម្ពុជា​ដែលបានគាំទ្រគោលនយោបាយ​ចិនតែមួយ និងបញ្ហាសមុទ្រចិន​ខាង​ត្បូង។

ក្នុងឱកាសនោះ លោក​ឧបនាយករដ្ឋមន្ត្រី យឹម ឆៃលី បានថ្លែងអំណរគុណដល់រដ្ឋាភិបាល ចិនដែលបានជួយដល់កម្ពុជាយ៉ាងច្រើនលើគ្រប់ផ្នែក គ្រប់វិស័យ រួមចំណែកដល់សន្តិភាព និងការ​អភិវឌ្ឍន៍នៅកម្ពុជា។ លោក​ឧបនាយករដ្ឋមន្ត្រីបន្តថា ក្នុងអាណត្តិបេសកកម្មការទូតនៅកម្ពុជា លោក​ស្រី​ ប៊ូ ជៀនគ័រ បានជួយដល់កម្ពុជាច្រើនណាស់ ក្នុងនោះ បានសម្រួលដល់ដំណើរ​ទស្សនកិច្ច​របស់​គណ:ប្រតិភូជាន់ខ្ពស់ នៃក្រុមប្រឹក្សា ស្តារអភិវឌ្ឍន៍វិស័យកសិកម្ម និង​ជនបទ ដឹកនាំ​ដោយលោក​ឧបនាយករដ្ឋមន្ត្រី យឹម ឆៃលី ទៅបំពេញទស្សនកិច្ច និងចូលរួមប្រជុំ​នៅប្រទេសចិន​ស្តីពីនយោបាយខែ្ស​ក្រវ៉ាត់១ ផ្លូវ១ និងបានជួបពិភាក្សាការងារជាមួយលោក​អតីត​ឧបនាយករដ្ឋមន្ត្រី ​ចិន ហ្ស៉ាង កៅលី ដែលបច្ចុប្បន្ន លោក​ជាអនុប្រធានរដ្ឋចិន ដែលផ្តល់នូវផ្លែផ្កាយ៉ាង​ច្រើនលើ​កិច្ច​សហប្រតិបត្តិការរវាងប្រទេសទាំងពីរ ពិសេស បាន​ជំរុញឲ្យអ្នកវិនិយោគទុនចិនជាច្រើនមកបណ្តាក់​ទុននៅកម្ពុជា ក្នុងនោះ យើងបានកត់សម្គាល់លើកិច្ច​ព្រមព្រៀងរវាងកំពង់ផែស្វយ័តក្រុងព្រះសីហនុ និងកំពង់ផែក្រុងស៊ីងតាវ ដែលរហូតដល់ពេលនេះ មាន​កប៉ាល់ដឹកទំនិញចិនបានចូលមកកំពង់ផែ​ក្រុង​ព្រះសីហនុចំនួនពី២ ទៅ៦ជើងក្នុង១សប្តាហ៍។

ជាទីបញ្ចប់ លោក​ឧបនាយករដ្ឋមន្ត្រី បានជូនពរដល់លោកស្រី​ ប៊ូ ជៀងគ័រ ឲ្យមាន​សុខភាពល្អ និងទទួលបានជោគជ័យក្នុងភារកិច្ចថ្មីបន្តទៀត និងពេលលោកស្រី​ត្រឡប់​ទៅ​ប្រទេស​ចិនវិញ​ សូមជួយផ្សព្វផ្សាយពីសក្តានុពល និងឱកាសអំណោយផល​ដល់ការ​វិនិយោគ​នៅកម្ពុជា ដើម្បីជំរុញវិនិយោគិនចិនមកវិនិយោគនៅកម្ពុជាឲ្យកាន់តែច្រើនថែមទៀត ដើម្បីរួម​ចំណែក​ដល់​កំណើន​សេដ្ឋកិច្ចជាតិកម្ពុជា៕

photo_2016-08-01_13-26-18

photo_2016-08-01_13-26-20

photo_2016-08-01_13-26-21

photo_2016-08-01_13-26-19