ភ្នំពេញៈ លោក ឈុន សុវណ្ណភក្តី ចាងហ្វាង ផលិតកម្ម BKS បានធ្វើការ អះអាងថា កំពុងមានទំនាក់ទំនងជាមួយនឹងផលិតករថៃដ៏ល្បីម្នាក់ ដោយបោះទុនរួមគ្នា ដើម្បីផលិតខ្សែភាពយន្តបម្រើដល់ អារម្មណ៍ទស្សនិកជន នៅកម្ពុជា។

ការអះអាងខាងលើនេះ ក្រោយ Post News បានឈ្លេចសួរ នៅល្ងាច ថ្ងៃទី១១ ខែមិថុនា ឆ្នាំ ២០១៦ ក្រោយបានឃើញ សាររ៉ាយរ៉ាប់របស់ ចាងហ្វាងខាងលើ នៅលើបណ្តាញទំនាក់ទំនងសង្គមហ្វេសប៊ុក ។

លោក ឈុន សុវណ្ណភក្តី បានប្រាប់តាមរយៈខ្សែទូរស័ព្ទពីប្រទេសថៃ ដល់ Post News ឲ្យដឹងថា ដោយមានឪពុកធម៌ ជា ជនជាតិថៃ រស់នៅក្នុងប្រទេសថៃផង បានធ្វើឲ្យលោកស្គាល់ ផលិតករថៃ ១រូបដ៏ល្បីល្បាញ ដែលជាអ្នកដឹកនាំផលិតភាពយន្ត «នាងណាត» ។ ចាងហ្វាងវ័យក្មេងខាងលើបាននិយាយថា «ពេលនេះ ថៃគេកំពុងចាប់អារម្មណ៍ ចង់ចាយទុនរួមគ្នា ជាមួយនឹងផលិតកម្ម BKS ដើម្បីផលិតភាពយន្តនៅកម្ពុជា»។

ឈុន សុវណ្ណភក្តី បានបន្ថែមទៀតថា សម្រាប់ការទំនាក់ទំនងនេះ មិនទាន់ចេញជាផ្លែផ្កា ១ ០០ ភាគរយ នោះទេ ហើយលទ្ធផល យ៉ាងម៉េច យ៉ាងម៉ា លោកនឹងប្រាប់តាម ក្រោយ។ ក្រៅពីមានទំនាក់ទំនងជាមួយនឹងអ្នកដឹកនាំលេខ១ របស់ថៃ ចាងហ្វាងផលិតកម្ម BKS ក៏កំពុងបន្តដំណើរ ជាមួយនឹង ឪពុកធម៌របស់ខ្លួនជាជនជាតិថៃ ទៅកាន់ សឹង្ហបុរីទៀត ដើម្បីទាក់ទង ផលិតករនៅទីនោះ ផងដែរ៕

ផលិតករថៃ រូបខាងស្តាំ ពាក់អាវពណ៌ស និងវ៉ែនតា