Post News Media ព័ត៌មានជាតិ កាប់សម្លាប់គេ...

កាប់សម្លាប់គេ គេចខ្លួនបាត់២ឆ្នាំ ឃាត់ខ្លួនបានហើយ!

បាត់ដំបង: នៅ ថ្ងៃ ព្រហស្បតិ៍ ១១រោច ខែ បុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ១២ ខែ មករា ឆ្នាំ ២០១៨ តាមបទបញ្ជាបន្ទាន់បំផុតរបស់លោក ឧត្តមសេនីយ៍ទោ អ៊ុច សុខុន ស្នងការនៃ ស្នងការដ្ឋាននគរបាលខេត្តបាត់ដំបង ឧត្តមសេនីយ៍ត្រី ជេត វណ្ណនី ស្នងការរងទទួលផែន នគរបាលយុត្តិធម៌ បានដឹកនាំកម្លាំងនគរបាលជំនាញ រួមជាមួយកម្លាំងនគរបាលនៃអធិការដ្ឋាននគរបាលស្រុកកម្រៀង សហការជាមួយ កងកម្លាំងនគរបាលរាជធានីភ្នំពេញ ចាប់ខ្លួនឧក្រិដ្ឋជនម្នាក់ ដែលគេចខ្លួនពីរាជធានីភ្នំពេញ មកសម្ងំលាក់ខ្លួននៅក្នុងភូមិសាស្រ្តស្រុកកម្រៀង ខេត្តបាត់ដំបង ក្រោយពីកាប់សម្លាប់ជនរងគ្រោះឈ្មោះ អេង ម៉េងឃាង ភេទប្រុស អាយុ២០ឆ្នាំ កាលពីថ្ងៃទី ២៩ ខែធ្នូ ឆ្នាំ២០១៦។

ជនល្មើសឈ្មោះ ហេង បញ្ញា ហៅ បញ្ញា ភេទប្រុស អាយុ ២៦ ឆ្នាំ នៅសង្កាត់មនោរម្យ ខណ្ឌ៧មករា រាជធានីភ្នំពេញ បច្ចុប្បន្នបានប្រគល់ជូនសមត្ថកិច្ចនគរបាលរាជធានីភ្នំពេញ ដើម្បីចាត់ការតាមនីតិវិធីច្បាប់៕