បាត់ដំបង: កាលពីថ្ងៃព្រហស្បតិ៍ ១០រោច ខែបុស្ស ឆ្នាំរកា នព្វស័ក ពុទ្ធសករាជ២៥៦១ ត្រូវនឹងថ្ងៃទី១១ ខែមករា ឆ្នាំ២០១៨ វេលាម៉ោង៨និង៤៥នាទីយប់ សមត្ថកិច្ចបានចុះប្រត្តិបត្តិការបង្ក្រាប ករណីរក្សាទុកគ្រឿងញៀន​ខុសច្បាប់ ចំនួន១ករណី ក្នុងបទល្មើសជាក់ស្ដែង ស្ថិតត្រង់​ចំណុចរង្វង់មូលលោកយាយទេព ភូមិអង់ សង្កាត់អូរចារ ក្រុងបាត់ដំបង ខេត្តបាត់ដំបង។​

​ជនសង្ស័យ​មានឈ្មោះ ស៊ិន គឹមហ៊ុយ ហៅអិនជី ភេទប្រុស អាយុ២៤ឆ្នាំ មានទីលំនៅភូមិចម្ការសំរោង១ សង្កាត់ចម្ការសំរោង ក្រុងបាត់ដំបង ខេត្តបាត់ដំបង។ ចំណែកវត្ថុតាងដែលដកហូតបាន រួមមាន ​ម៉ូតូមួយគ្រឿង​ម៉ាកហុងដាឌ្រីម​សេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខបាត់ដំបង1W-3517 ថ្នាំញៀនប្រភេទមេតំហ្វេតាមីន(ម៉ាទឹកកក ICE ) ចំនួន​៤ថង់ ទម្ងន់១៥,​៩ក្រាម ​ទូរសព្ទដៃស៊េរីចាស់មួយគ្រឿង កាបូបដាក់លុយ​ចំនួន១ ប្រអប់ដាក់គ្រឿងញៀនចំនួន​១។

ឆ្លងតាមចម្លើយសារភាពរបស់ជនសង្ស័យឈ្មោះ ស៊ិន គឹមហ៊ុយ ហៅអិនជី និងមានការអនុញ្ញាតពីលោក នួន សាន ព្រះរាជអាជ្ញាអមសាលាដំបូងខេត្តបាត់ដំបង ក្រុមអន្តរាគមន៍បង្ការបង្ក្រាប បានបន្តប្រតិបត្តិការរហូតដល់​ ឃាត់ខ្លួនជនសង្ស័យ​ម្នាក់ទៀត នៅចំណុចភូមិវាលទ្រា ឃុំអូរតាគី ស្រុកថ្មគោល ខេត្តបាត់ដំបង នៅថ្ងៃដដែល វេលាម៉ោង៩និង៣៥នាទីយប់ ដែលជនសង្ស័យមានឈ្មោះ រិទ្ធ សុវណ្ណា ហៅខ្លា ភេទប្រុស អាយុ១៩ឆ្នាំ មានទីលំនៅភូមិវត្តរំដួល សង្កាត់ចម្ការសំរោង ក្រុងបាត់ដំបង ខេត្តបាត់ដំបង​​ និងដកហូតបាន​វត្ថុតាង​រួមមាន ​ម៉ូតូមួយគ្រឿង ម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ បាត់ដំបង 1X-5912 ទូរសព្ទដៃស៊េរីចាស់មួយគ្រឿង និងកាបូបដាក់លុយ១។

បច្ចុប្បន្ន ជនសង្ស័យនិងវត្ថុតាង ត្រូវបានការិយាល័យជំនាញ កំពុងតែរៀបចំសំណុំរឿង បញ្ជូនទៅតុលាការ៕