ភ្នំពេញៈ ជនសង្ស័យម្នាក់ ធ្វើសកម្មភាពឆក់កាបូបពីស្ត្រីបានសម្រេច តែគេចមិនរួច ត្រូវបានប្រជាពលរដ្ឋដេញតាមចាប់ខ្លួនបានប្រគល់ឲ្យសមត្ថកិច្ច កាលពីវេលាម៉ោង១០ព្រឹក ថ្ងៃទី១៣​ ខែមករា ឆ្នាំ២០១៨ ស្ថិតនៅចំណុចផ្ទះលេខ៣១ ផ្លូវលេខ៧០ ភូមិ២១ សង្កាត់ស្រះចក ខណ្ឌដូនពេញ រាជធានីភ្នំពេញ។

ជនរងគ្រោះមានឈ្មោះ ពុំ ស្រីឡេង ភេទស្រី អាយុ៣៤ឆ្នាំ មុខរបរលក់អីវ៉ាន់នៅផ្សារតូច ស្នាក់នៅផ្ទះលេខ១៩ ផ្លូវលេខ២២៨ ភូមិ៣ សង្កាត់បឹងសាឡាង ខណ្ឌទួលគោក។ ចំណែកជនសង្ស័យមានឈ្មោះ ជ.ម.គ ភេទប្រុស អាយុ១៧ឆ្នាំ មុខរបរសិស្សសាលា ស្នាក់នៅក្នុងខណ្ឌសែនសុខ។

មុនពេលកើតហេតុ ជនរងគ្រោះបានចេញពីផ្ទះនៅបឹងសាឡាង ជិះម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1W-2785 គោលបំណង់ទៅកន្លែងលក់អីវ៉ាន់នៅផ្សារតូច ធ្វើដំណើរតាមបណ្ដាយផ្លូវលេខ៧០ ទិសដៅពីលិចទៅកើត លុះដល់ចំណុចកើតហេតុ ក៏មានជនសង្ស័យម្នាក់ ជិះម៉ូតូមួយគ្រឿងម៉ាកហុងដា សេ១២៥ សេរី២០១៨ ពណ៌ខ្មៅ ពាក់ស្លាកលេខ ភ្នំពេញ 1GS-3543 ជិះមកទន្ទឹមជនរងគ្រោះធ្វើសកម្មភាពឆក់កាបូបពីជនរងគ្រោះបានសម្រេច ហើយប្រញាប់បត់ម៉ូតូត្រឡប់ក្រោយវិញ បម្រុងជិះរត់គេចខ្លួន តែសំណាងអាក្រក់បណ្ដាលឲ្យ​ដួល ត្រូវប្រជាពលរដ្ឋចាប់ខ្លួនបានតែម្តង។

បច្ចុប្បន្នជនសង្ស័យរួមនិងវត្ថុតាង កំពុងត្រូវបានសមត្ថកិច្ចធ្វើការសាកសួរនិងកសាងសំណុំរឿងបញ្ជូនខ្លួនទៅកាន់តុលាការចាត់ការតាមច្បាប់បន្តទៀត៕