កណ្ដាលៈ អស់រយៈពេល៥ថ្ងៃ ក្នុងយុទ្ធនាការបង្ក្រាបឃាតករស្រីឆើតដៃដល់ ចាក់សម្លាប់អ្នកសារព័ត័មានសម្លេងប្រជាជន កាលពីវេលាម៉ោង៦ និង២០នាទីយប់ថ្ងៃទី២១ ខែមករា ឆ្នាំ២០១៨ ស្ថិតក្នុងបន្ទប់លេខ១១ ផ្ទះសំណាក់យីហោ «សំណាងណាស់» ក្នុងភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល កម្លាំងនគរបាលព្រហ្មទណ្ឌកម្រិតធ្ងន់ សហការជាមួយនគរស្រុកអង្គស្នួល ដឹកនាំដោយលោកវរសេនីយ៍ មាន សំណាង អធិការស្រុកអង្គស្នួល ដោយមានការបញ្ជាពីឧត្តមសេនីយ៍ត្រី រឿន ដារ៉ា ស្នងការរងទទួលផែនព្រហ្មទណ្ឌ បាននាំឃាតកដៃឆៅស្រីស្អាត ចាក់សម្លាប់ភ្នាក់ងារកាសែតសម្លេងប្រជាជនជាច្រើនកាំបិត ទៅធ្វើត្រាប់ និងនាំទៅយកវត្ថុតាងដែលឃាតក បានយកទៅលក់មកវិញ។
តាមសមត្ថកិច្ច បានឲ្យដឹងថា ជនសង្ស័យជាឃាតករដៃដល់ បានសារភាពថា មុននិងសម្រេចចិត្តចាក់សម្លាប់ជនរងគ្រោះ គឺដោយសារខ្លួនចង់បានលុយចំនួន២៥០០ដុល្លារ ឲ្យលោកមេធាវី ឈ្មោះ ស៊ូ ដារ៉ា ដើម្បីធានាឲ្យប្តីរបស់ខ្លួនចេញពីពន្ធនាគារព្រៃស ពាក់ព័ន្ធនឹងរឿងគ្រឿងញៀន កំពុងជាប់ឃុំឃាំងជិត៣ខែហើយ។
ជនសង្ស័យមានឈ្មោះ ផេង ណាត អាយុ៣២ ឆ្នាំស្នាក់នៅផ្ទះជួលក្នុងភូមិ ព្រៃបឹង សង្កាត់កន្ទោក ពោធិ៍សែនជ័យ បានបញ្ជាក់ថា ប្ដីរបស់នាងមានឈ្មោះ សាត ប៊ុនចាន់ ត្រូវបានសមត្ថកិច្ចចាប់ខ្លួននៅស្ពានព្រែកព្នៅ ។
សូមជម្រាបថា បុរសម្នាក់ដែលជាភ្នាក់ងារកាសែតសម្លេងប្រជាជន ត្រូវបានស្រីស្នេហ៍ចាក់សម្លាប់ចំនួន១៧កាំបិតស្លាប់ យ៉ាងអាណោចអាធ័ម ក្រោយពួកគេចូលក្រេបទឹកឃ្មុំនៅក្នុងផ្ទះសំណាក់មួយកន្លែង ។
ហេតុការណ៍នេះ បង្កឲ្យមានការភ្ញាក់ផ្អើលឡើង កាលពីវេលាម៉ោង០៦ និង២០នាទីយប់ថ្ងៃទី២១ ខែមករា ស្ថិតក្នុងបន្ទប់លេខ១១ ផ្ទះសំណាក់យីហោ «សំណាងណាស់» ក្នុងភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល។ ករណីនេះ មិនមាននរណាម្នាក់ដឹងពីទំនាស់នេះឡើយ ដែលឈានដល់ការចាក់សម្លាប់បែបនេះ ក្រោយកើតហេតុគេបានឃើញស្ត្រីដៃដល់ ជិះម៉ូតូរបស់ជនរងគ្រោះ គេចខ្លួនបាត់តែម្ដង។
តាមសេចក្តីរាយការណ៍ បានអះអាងថា បុរសដែលស្លាប់នោះ ឈ្មោះ នួន សុភាព អាយុ៥៨ឆ្នាំ មានរបរបើកហាងកោសជប់ និងម៉ាស្សា ហើយក៏ជាអ្នកសារព័ត៌មានសម្លេងប្រជាជនផងដែរ មានទីលំនៅក្នុងភូមិស្រែអំពិល សង្កាត់ស្នោរ ខណ្ឌពោធិ៍សែនជ័យ រាជធានីភ្នំពេញ ។
ប្រភពដដែលបន្តថា ជនរងគ្រោះត្រូវបានស្រីស្នេហ៍ចាក់ប្រហារចំនួន១៧កាំបិត ចំត្រង់ត្រង់ពោះ ចង្អុលដៃស្ដាំ ខ្នងដៃខាងឆ្វេង បាតដៃខាងឆ្វេងនិងភ្លៅស្ដាំ ។
វត្ថុតាងនៅកន្លែងកើតហេតុ រួមមាន៖ ភួយពណ៌ផ្កាឈូក១ កន្សែងពណ៌ក្រហមប្រឡាក់ដោយឈាម១ ខ្នើយគ្របសង្កត់លើមុខជនរងគ្រោះ១ កំរាលពូកពណ៌ផ្កាឈូកប្រឡាក់ដោយឈាម១ ខោលីអូរពណ៌ក្រហមនៅលើពូកផ្នែកចុងជើង១ វ៉ែនតាខ្មៅ១ ស្រោមអនាម័យមិនទាន់ប្រើ២ ច្រាស់ដុសធ្មេញមិនទាន់ប្រើ២ សាប៊ូ២ដុំ ទឹកសុទ្ធ១ដប ជើងមាន់ឆ្អិន១កញ្ចប់ វិទ្យុទាក់ទងម៉ាកម៉ូតូរ៉ូឡា១គ្រឿង ខោជើងវែងពណ៌ត្រេអី១ អាវយឺតដៃវែងពណ៍សលាយខ្មៅនិងខៀវ១ អាវយឺវាលឃ្លៀកពណ៌ខ្មៅ១ ស្រោមជើងមនុស្សស្រី១គូពណ៌ខ្មៅ មួកសុវត្ថិភាព១ ខ្សែក១ខ្សែ កាំបិតចុងស្រួចប្រឡាក់ឈាម១ និងសម្ភារៈមួយចំនួនទៀត៕
https://youtu.be/qeOcGtgvykU
https://youtu.be/shmhOSL_w4c
មតិយោបល់